La fiesta del branu venía siempre a concretase mayormente en bañase na mar, dir d’excursión y sometese a fartures. Agora les nueves circunstancies de más turismu internu español y comerciu internacional abren la posibilidá d’ otres relaciones humanes novedoses. Vamos poner un casu vivíu nuna de les nuestres villes vacacionales más famoses. Esto ye’l mediudía d’una xornada calenturienta dientro d’un chinu de dos pisos, o seya una tienda china curiosa. Y d’esmenu, ¿qué pasa? Qu’entra un grupu de seis moces y mozos de vistosa presencia y marcáu acentu andaluz. Namás entrar llogren d’alguna manera que salte l’alarma, lo que pon en guardia al personal del comerciu. Entós va un chaval, el más altu, y pregunta-y a la caxera, que ye chavalina tamién, pero china, lo siguiente: “¿tenéis equí una bola?”, debuxando coles dos manes la forma d’esi obxetu. La china non lo pilla y el chaval sigue: “con ñeve dientro”. La caxera sigue ablucada, con que’l otru termina en punta: “una d’eses boles que ponen Asturias”, marca un lletreru nel aire separtando los deos índiz y pulgar de dambes manes. “¡Ye que ye un souvenir ¡”, salta detrás d’él una de les sos collacies, que lleva un guapu vestíu llargu, enforma tresparente, de rayes de collores. La caxera china diz por fin que non, que nun tienen a la venta la tal bola, a lo que’l portavoz de los xóvenes turistes sureños retruca: “pero polo menos tendréis comida equí, ¿non?” Too esto dicho n’andaluz, digo. Pero pa entós los amigos y amigues ya tiraben pa la puerte y per ellí colaron toes a carrenderes. En realidá la bola de recuerdu que buscaben pué alcontrase en sitios más llariegos, como “El Siglo”. Ye más pequeña que les de navidá, lleva dientro figures asturianes y eso sí, si la ximielgues cai ñeve ambute.
Dempués de la folixa braniega llega la rentrée. A min préstame esa pallabra francesa, la retorna podíemos dicir nós. Y repítola tolos años porque refierse a la vuelta al cole pero tamién a la vuelta al tayu, a la vuelta al puestu y a la vuelta a los traumes neurasténicos de ca ún. Nel nuestru calendariu, amás, la retorna trainos bien ceo festexos perserios , como son el Día de la Virxen de Covadonga y el Día de la Comunidá Autónoma, que de momentu van hermanaos na mesma fecha. Y como resultáu de les vueltes que-yos damos a les décades pasaes les que llevamos dalgunes enrriba, o como inspiración de los munchos dáimones qu’esnalen alrrodiu de les fiestes series, o por les dos coses, el casu ye que nun se me van de la tiesta les figures de dos persones, de dos personaxes de la vida asturiana a les que tuve y tengo un calláu afeutu: José María Alonso-Vega y Luis Vega Escandón. Los dos foron importantes na política asturiana y española, los dos foron, pamidea, espeyos d’una democracia firme y sabida. Dalgún escritín tengo publicáu cuantayá sobro propuestes y teoríes del primeru. Sicasí quixere cuntar lo que me dixo una vez, como al debalu, Luis Vega Escandón. Esto foi a finales de los setenta y ensin dubia él atendía a lo que d’aquella entamaba l’asturianismu. “Lluís”, y mirábame como quien tresllada una clave secreta, “de verdad creo que el fondo del asunto está en el dicho popular de que Asturias es España y lo demás tierra conquistada”. ¿Quieren ustedes creyer qu’esi ye’l camientu que me refierve agora que revelé esta anécdota de hai cuarenta años? ¿Que igual hai que revisar, sigún va la res publica, esi dichu popular?
