Los carreros del tiempu

Marta Mori d’Arriba ganó’l XXVIII Premiu "Xuan María Acebal" de Poesía con "Los carreros del tiempu". Marta Mori gana normalmente premios de poesía y aporta asina forma y calidá a la lliteratura asturiana. Ún de los elementos d’esi valir ye la vocación de continuidá d’una escritura que rescampla como secuencia de vida. Los poemes de "Los carreros del tiempu" son un cumal porque nun solo acompanguen al acontecer concretu de les experiencies personales. Inda más ábrense a perspectives que’amuesen la vía hacia un estilu maduru. El llibru anterior "Orfandá", de 2019, nun dexa de ser una variación familiar, sigún el títulu mesmu, pero’l lléxicu y los llugares oldéense a los d’ésti recién y más abiertu.

"Los carreros del tiempu" desplieguen dende’l indiz una temática plural. "De Vita Privata", "De Natura", "De Pandemia", "De Mundo" son seiciones que contienen poemes d’estremáu calter hasta’l últimu, "Epílogu", na páxina 72. El primeru y sueltu, "Estraña", anicia’l poemariu con un tonu que glosa la idea dantesta d’alcontrase "nel mediu del camín de la nuestra vida". (Los versos de Dante son cita introductoria de tol llibru y van nel toscanu orixinal). Marta Mori diz nel cuartu versu : "Piso los carreros que’l tiempu abre". Y más pa baxo nun se corta: "Soi estraña / nuna tierra estraña. / El deséu apártase de mí". Nostante la obra de Mori ta enllena de poemes de tou tipu: llíricos, sociales, políticos, feministes, de reconocencia, de toponimia, de muyeres canóniques de la poesía, d’esamen de los meyores mayestros, de les estaciones y de los páxaros. Tamién d’ella mesma siempres y con referencia a poetes próximes, como Olvido García Valdés o Concha Quintana, o preferíos como Joan Margarit. Tampoco nun falten tópicos bien aceñaos de la cultura clásica.

En "De Vita Privata" lléese "Brindando por Li Po" (páxina 18) que cuenta un allegre brindis adolescente con amigues y amigos con nome propiu. Sé por experiencia de mió que’l antigüu poeta chinu Li Po val y sal muncho neses charres de poética mocedá. En "De Natura" atopamos "Los Mares" (páxina 44): son plurales poles metonimies sol mar de dellos grandes de la poesía, que van d’Homero a Borges, Kavafis, Pessoa, Espriu y otros d’una llista del mesmu altor. En "De Pandemia" hai más d’ún poema de trayectos y el "Trayectu II", (páxina 55), xurdíu d’un versu mui popular de Louis Aragon, entama así: "El Llano Pumarín Roces / detrás Xixón / detrás les calles familiares / Porceyo Pinzales"… Y acaba por "Fitoria Villamaxil / Uviéu al borde del Narancu / Uviéu al fin / abeyu y llibertá / igual qu’entós / aliendu y momentánea". El poema trata de la esperanza de la poeta, "mon espérance" en francés. Pero nun s’esclaria cuál ye’l el vehículu del míticu trayectu. A la fin en "De Mundo" la voz poética de Marta Mori ofrez dende los primeros versos d’"Epílogu" un marcu renováu de sentíu. "Cada primavera escribo sobre la primavera. / Siento imprevista la caricia / del sol nes manes y na cara / y déxome llevar con ello / al suañu de la renacencia. / Reviven los colores. / Revive torpe’l deséu / de ser otra, de dexame atrás. Como Dafne atrapada na fuga de mi mesma, / alzo los güeyos al sol."

Quixere sorrayar de "Los carreros del tiempu" un recursu vanguardista que presta cuando ta bien trayíu. Los poemes "Seronda" (páxina 48) y "Avenida Schultz" (páxina 67) tienen enxembre la forma de poesía concreta: lo visual del espaciu y lo textual de la lletra xúnense nel efeutu estéticu.

Suscríbete para seguir leyendo