«Cultures», númberu 27

Salió’l númberu correspondiente de «Cultures, revista asturiana de cultura» (ALLA, 2023), que tien una periodicidá añal. Esti númberu 27 contién temes que se revisiten y autores que van faciéndose veceros. Y nun siendo monográficu xúntense n’él una variedá d’asuntos que se sofiten unos a otros en perspectives orixinales. Tantos que nun caben toos nesta columna pero cuento que sí notra viniente. Los conteníos cunden n’erudición, en sentíu social y en procuru llinguísticu.

Álberto Álvarez Peña torna al debate del llobu y del ganáu (páxina 9) con cifres y datos pero ofrez aína un testimoniu d’emotivu poder lliterariu: les experencies suyes y de los sos collaciones, cuando más mozos, en contautu con llobos: Alberto ta seguru de que’l llobu nun tien por enemigu natural al animal humanu y alvierte que nun conoz de fechu nengún casu d’ataque. Por otru llau Álvarez Peña tien otres dos intervenciones nel índiz. Fala de la melecina máxico-tradicional pa la malura de los güeyos (páxina 161) y fai una reseña de dos llibros que él mesmu ilustró y prologó (páxina 197): contienen dellos cuentos de Martín del Villar, en eonaviego. Javier Fernández Conde, ilustre y queríu sacerdote, catedráticu, historiador medievalista y miembro de l’ALLA, presenta un trabayu (páxina 69) dende la documentación del que foi Monesteriu de Santa María de Lapedo (Balmonte). Trátase d’un diccionariu comparáu de términos medievales con términos n’asturianu y en castellán que son preba de la realidá llinguística del asturianu naquelles dómines. Margarita Fernández Mier y Luis Miguel Flecha Rebollar presenten un proyeutu d’investigación tituláu «Los estudios de les comunidaes llocales nun marcu globalizáu» (páxina 81). Eso supón l’usu de l’arqueoloxía más avanzada cuando’l territoriu escoyíu ye un asentamientu d’orixen medieval ocupáu hasta hai poco: propónse l’habitat de dos aldees asturianes, una de mediu monte, Vigaña (Miranda), y otra asitiada al fondu d’un valle, Villanueva de Santo Adrianu. L’arqueoloxía de güei tien que siguir el procesu científicu pero con una hermenéutica propia aplicada al llugar concretu. Martín de Villar describe n’un llargu y ricu textu en eonaviego, «Manual del Rexistrador» (páxina 103), lo que yera la vida de los albeitres, los curanderos del ganáu, y del rexistrador. Ésti yera l’autoridá última de la venta nel mercáu, dando por bona la salú de los animales y el preciu conveníu ente comprador y vendedor. Hai diálogos con munchos informantes y una riestra de fotografíes. Vemos a Venancio de Corredoira, compostor y albeitre de A Veiga nacíu en 1876 «subido na bestia coa qu’iba de poblo en poblo atendendo gado». Dani García de la Cuesta, col títulu de «De por qué se dexen mazanes na pumar», (páxina 141), fai un recorríu divertíu poles opiniones series o les intuiciones tradicionales, toes entemecíes, que tovía agora contesten a esa entruga. Paez ser que la meyor dió-yla a Dani el 18 de febrero de 2023 una moza cincuentañera de Nava, Julia. Na collecha de la pumar hai que dexar dalgunes mazanes «pa que nun s’enfade l’árbol». Resulta que hacia 1978 polo menos na zona inglesa de Devon creyíen lo mesmo. Dani García da la referencia erudita: hai que dexar la última mazana porque asina lo quier l’espíritu del manzanu, cara a la próxima collecha. Xuan Pedrayes Obaya xube’l tonu d’humor al inventar el conceutu de «Paisaxe cachopu». Nel resume del so capítulu (páxina 153) atópase la clave: «El paisaxe cachopu ye una simplificación del país, un clixé turísticu y anacrónicu: una ilusión. La realidá ye un espaciu poco transitáu agora. L’ethos anováu d’esti sieglu ha fabricar un país asturianu nuevu: un paisaxe distintu, onde reconocese ensin requilorios».

Suscríbete para seguir leyendo