Llibros y discutiniu

Ún de los llibros qu’hai qu’estudiar con ciñu estos díes ye "Astures: gens Hispaniae, Iglesia local y nación histórica", escritu por José Ramón García Fernández. El conocíu ñomatu del autor, "Monchu’l cura", y l’usu de la expresión llatina del títulu –"el pueblu asturianu de Hispania"– ponnos delantre d’esa persona siñalada que xune en sí al clérigu y al eruditu y que tien por segura la querencia de la ciudadanía. Monchu tá ehí de siempres –anantes de "Conceyu Bable" y hasta agora– con virtúes y asturianía propies. Prestaráme falar del so llibru como se merez pero dexáime referime güei, veceros de la columna, a otros llibros y otros discutinios d’estes selmanes pasaes.

Noto interesáu que’l periodismu actual nun consiste namás en trabayar nos periódicos de tola vida sinon tamién n’escribir nos medios dixitales, llanzar revistes, caltener blogs y emplegar la información como base y materia d’obres y llibros de conteníu teóricu y polémicu. Los saberes universitarios d’humanidaes posibiliten eso y tengo a la vista dos novedaes d’esi tipu. "La ira azul", de Pablo Batalla, y "Disputar las banderas", de Diego Díaz, son dos llibros de Trea que van dirixíos de frente a custiones d’esti momentu: arreglos, cambeos y lluches político-conceptuales del sieglu XXI en marcha. Paezme que puedo presumir de cierta rellación personal con esos dos autores a cuenta d’haber fecho xuntos, como dicilo, filosofía. Pero resulta qu’acabamos de venos en presencia –o seya, más cerque que nes pantalles d’ordenador– gracies a la llamada d’otru amigu periodista y escritor de la nuestra cultura presente: Xuan Cándano. Resultó que’l día 22 de marzu fízose nel Campus del Milán d’Uviéu un eventu que foi un diálogu, o mesa reonda, na que taba tamién David Guardado, l’historiador y académicu de l’Alla. Moderó Pablo M. Testa, miembru de GIMEC, que proponía un tema que yera más bien una tema qu’aportaba ensin remediu al discutiniu: "Territorialidaes, nacionalidaes, y modelu d’Estáu". Como servidor nun pasaba de ser un invitáu atentu sentí con emoción les intervenciones de los cinco collacios mentes pensaba pa mín qué dicir nel coloquiu ensin tresvolicar demasiao. Entamó Pablo M. Testa, un trentañeru mui sueltu y simpáticu que vive en Barcelona. Contó les aiciones suyes ente la población más desintegrada y dixo que’l factor nacional podía producise por propaganda, que’l prefería la estratexa de la intervención social. Y foi entós cuando dime cuenta de que Pablo M. Testa, residente en Cataluña, taba falando n’asturianu. Un asturianu direutu, cantarín, simple pero non simplayu, natural como si viniere de lloñe nel tiempu. Pero non, cuando’l rapaz ñaciere, nos años noventa del sieglu pasáu, el bable del xóven Testa yera la llingua asturiana que Conceyu y l’asturianismu tuvieren preparada y servida en bandexa en menos de venticinco años. Otros venticinco pasaren y agora equí, na biblioteca universitaria, dempués de Testa, siguió’l discutiniu y nortié, calláu, cómo tol mundu, asistentes y ponentes, discutíen d’historia, de territoriu, de llucha de clases, de sexos y xéneros, del futuru del Estáu, y que lo facíen n’asturianu. Y nun ye que tuviéremos metíos n’una "perfomance" sinon que yéramos públicu y actantes d’un actu cultural en llingua asturiana.

Pablo M. Testa yera’l promotor y nós les anfitriones de seya lo que seya GIMEC. Por ende diéronme ganes de plantegar a David Guardado, Xuan Cándano, Pablo Batalla, Diego Díaz, y a más intelectuales del país, la xera d’un bon "think tank" o gabinete estratéxicu. A la fin un tanque pué ser un arma o un cazu pa beber.

Suscríbete para seguir leyendo