Quemar banderes d'España o xiblar l'himnu ye daqué a lo que yá tamos avezaos; too seya pola llibertá d'opinión que tan bien defendiera John Stuart Mill. Pero'l casu ye qu'a min estes coses fadienme, a cencielles porque son la Bandera y l'Himnu de mio, anque nun tenga lletra, pero son los símbolos del mio país y siempres que los menosprecien o insulten siento que, dalguna miente, tán despreciándome a min tamién. Yo callo, porque, dicen, ye más importante la llibertá d'opinón, pero tócame los pies -ponga caún nel llugar de pies lo que-y pete- cada vegada qu'esto asocede.
Anguaño toca-y el turnu al rei, al xefe del estáu, que nestos díes caberos vien siendo la diana de los atacamientos en forma de quema de figures nalgunos pueblos catalanes y comentarios de parte de dellos políticos d'esta comunidá autónoma. Unos más despreciatibles qu'otros.
Nel fin de selmana caberu, con ocasión de la inauguración de los Xuegos mediterráneos, el xenófobu presidente d'esa comunidá -esto nun ye insultar, namái hai que dir a les hemeroteques pa comprobalo- que ye, nun lo tenemos qu'escaecer, el representante del estáu nella, decolgóse con unes declaraciones según les cuales rompíen rellaciones cola Corona, anque al día viniente dexóse ver na inauguración de los xuegos citaos.
Too esto vien del discursu que'l rei ficiera con ocasión del desgraciáu referéndum illegal d'ochobre y la falta d'aición per parte del Gobiernu de la nación; n'él falaba de respetu a la Constitución y del quebrantu de la llei y de la desllealtá del Gobiernu catalán. Esta ye, según ellos, la gran falta del rei d'España.
Hasta equí munchos van dicir, ye lo que cabía esperar, y yo tamién lo pienso asina, el problema aporta cuando dempués de menos d'un mes de Gobiernu nuevu vemos que los nacionalismos, catalán y vascu, van más farrucos que nunca, el primeru retoma tol camín que llevó al 155 y manifiestase llistu pa otru referéndum tan illegal como'l pasáu, y el segundu diz que prepara un estatutu con dos tipos de ciudadanos -que sedríen categorizaos acordies col so pedigrí vascu- y con xusticia y seguridá social propies. Y el Gobiernu nacional nun díz un res o peor, da-yos cuerda.
Ayer la cosa fo aínda peor dempués de la entrevista del xefe de Podemos col presidente xenófobu. Entrevista, acordies coles sos pallabres, col alcuerdu del presidente del Gobiernu nacional y de la que salió cargando escontra'l rei al que, según paez, fai responsable de toles hestories asocedíes en Cataluña. El rei ye güei pa dalgunos el culpable de los males del país. Y el Gobiernu de la nación paez que nun tien un res que dicir.
El casu ye, señores, que'l rei reina pero nun gobierna nun ye responsable de dala aición política, los responsables son los políticos, unes veces por aición y otres por inaición, más los que tán nel Gobiernu que los que non, pero ye a ellos a quienes compete la aición executiva -Gobiernu- y la aición llexislativa -cortes- poro, echá-y les culpes al rei ye namái muestra de desidia y de ineptitú pal exerciciu de la aición política. Esto si ye que nun van más de lloñe guetando, unos y otros, minar la figura de la Corona con oxetivos de más llargu algame lo que sedría muncho más que desidia.
Son tiempos difíciles y cambiantes. Too esto paez que mos garró despreveníos -sobremanera a los del Partíu Popular-, tanto que tenemos un Gobiernu que nin siquier presentó programa, lo que nun lu descarga de la obligación de defender al xefe del Estáu, y va dándomos sorpreses cada día. Vamos ver si nun atopamos tamién sorpreses col túnel de Payares y col pieslle del carbón.
