“Con arrugues nos güeyos, pero non nel corazón”. Esti ye’l lema del vídeu fechu a comuña esta pasada Navidá polos neños del colexu Luisa de Marillac d’Avilés y la residencia d’ancianos Santa Teresa de Jornet, l’asilu de San Cristóbal. Na iniciativa, los más pequenos pregunten a los güelos poles sos alcordances navidiegues de cuando yeren mozos. Ellos miren a cámara y rescaten de les sos memories testimonios amorosiegos, un cachín de les sos navidaes pasaes pa zarrar éstes.
“¿Recuerda dalguna tradición que-y enseñaren sos padres per Navidá?”, entruga ún de los alumnos mozos. “Pues sí, alcuérdome perfectamente cuando mio madre facía un sacu enteru de “bollinas” y poníales na puerta pa da-ys de comer a tolos que quixeren”, respuende una de les residentes del centru. Les navidaes d’enantes nun yeren como les d’agora. Les celebraciones –inda en blancu y negru– encontábense na casa, na tradición, na unión y l’esfuerzu de los padres por traer siquier un regalu a casa pa caún de los fíos, que daquella solíen ser munchos. “La mio güela dábame trés castañes y 20 céntimos pa gastar”, asegura ún de los güelos de la residencia.
Una xeneración que demostró fortaleza d’ánimu y a la que dacuando s’arrequexa, pero qu’entá tien coses enforma que dicir y aportar. “¿Recuerda la cena de Nuechebona?”, entruga nel vídeu ún de los neños del colexu Luisa de Marillac. “Cómo lo voi escaecer. Yera la única vez en tol añu qu’axuntábemos tola familia”, recuerda emocionáu ún de los güelos de la residencia Santa Teresa de Jornet. Ún de los oxetivos principales de l’actividá ye “que los mayores enseñen a los nuesos alumnos más mozos los verdaderos valores de la Navidá”, aseguren dende’l centru educativu avilesín.
La sociedá y la manera de vivir les fiestes camudaron muncho dende entós. Por casu, una de les neñes entruga sobre cómo poníen ellos el belén. “Garrábemos el mofu y les piedres del monte que teníamos al llau de casa”, esplica una de les amorosiegues güeles nel vídeu. Otra rellata’l momentu más guapu que recuerda de la Navidá: la llegada de los Reis. “Mio madre dábanos a la mio hermana y a mi por imposibles esi día”, recuerda a risaes. ¿Y la cabalgata? Tampoco yera como agora. “Nel mio pueblu nun había”, comenta ún de los ancianos.
“¿Cuálos yeren los sos xuguetes favoritos?”, pregunta un rapacín. Ún de los güelos recuérdalo a la perfección: “Un coche de bomberos al que se-y daba cuerda y tocaba la serena”. Tocantes a les sos comíes favorites pa pegase una bona fartura navidiega, una de les ancianes nun lo dulda: “Los polvorones, el turrón y les uves pases”. El toque musical vien na entruga de los villancicos: “¿Hai dalgún que recuerde”? Caún de los entrevistaos diz el favoritu de so y hasta dalgún s’anima a cantalu de cabu a rabu.
La entruga con más miga ye la siguiente: “¿Qué conseyu daría a los neños pa celebrar la Navidá?”. Los güelos nun dulden un intre en dicir aquello a lo que munchos pequeños preferiríen facer oyíos de mercader: “Que seyan mui buenos, estudien muncho y faigan muncho casu a los sos padres y a profesores”. Les arrugues, ensin dulda, dan sabiduría.
