Xuegos, paseos y un llimoneru

Curiar el mediu natural, los animales y les plantes ye daqué perimportante pa los rapacinos. Munchos nagüen por un futuru verde y fain lo posible por caltener el mediu nel que viven: tan concienciaos col reciclaxe, esfruten cola güerta y colos nuevos biltos que medren y sorríen cuando sienten el cantar de los paxarinos. En el colexu corveranu de Los Campos, l’alumnáu d’Infantil plantó un llimoneru ya el vienres pasáu. "La idea ye concienciar sobre la importancia de conservar la natureza aprovechando’l Día del Mediu Ambiente. Un árbol que veran medrar sigún vayan pasando de cursu", desplicó el so maestru, Berto García.

Y n’Avilés, dellos escolinos de Primaria y Secundaria xugaron y deprendieron entá más sobre’l parque Ferrera, esi entornu verde asitiáu nel centru de la ciudá. L’actividá escomencipió bien ceo pa ponder sintir a los paxarinos qu’esnalen y añeren nos árboles. Depués hebo un xuego de reciclaxe peles praderíes del Ferrera amás d’un paséu pa conocer les variedaes botániques y pa finar, los escolinos avilesinos deprendieron un pocoñín de la hestoria d’esos xardinos que va más de cuarenta años yeren privaos y pertenecíen a los marqueses de Ferrera, pero eso ye otra hestoria.