Una galería d’arte nel colexu Laviada
Los escolinos d’Infantil decoren les parés del centru xixonés colos sos propios dibuxos a partir d’una exposición d’un cuentu de Paco Abril: "Desendolquen la creatividá"
El colexu Laviada, trubiecu de prometedores artistes. L’alumnáu del ciclu d’Educación Infantil enllenó los pasiellos y parés del centru xixonés d’obres feches pela so mano, convirtiendo les instalaciones nuna suerte de muséu del que los guah.es siéntense bien arguyosos. La iniciativa partió d’una esposición del cuentu "Los colores que se aman", del escritor Paco Abril. "Foi una motivación pa trabayar l’arte", confesó la tutora Ana Yolanda Flores. Los escolinos empezaron a esperimentar cola semeya, l’autorretratu y delles técniques. Y papáronse d’autores como Andy Warhol, Vincent van Gogh, Yayoi Kusama o Jackson Pollock, que-yos sirvieron d’inspiración.
Depués d’un intensu trimestre, el colexu entamó delles xornaes por que les families visitaren les obres de los alumnos. Unos díes nos que’l bativoléu yera talu que’l Laviada asemeyaba un auténticu muséu. Nada se fixo al azar. La distribución de los "cuadros" taba más que meditada. "Escoyemos los espacios en función de lo que la obra nos pida. Por casu, la de Kusama riquía unu más lluminosu y la de Van Gogh ye inmersiva", sorrayó Martina Álvarez, profesora de sofitu. Pieces na paré, otres colgaes o debaxo d’una escalera… "Un muséu ye dinámicu", indicó Álvarez.
"Ta perbién, asina enséñennos lo que faen en clase", afirmó Ismael Cortina, padre de la pequeña Alexia, que tien la so semeya al estilu Andy Warhol y amás ellaboró un dibuxu xunto a dos compañeros de clase. "Ta perguapo y amuesen los sos valores artísticos, que ye importante pa ellos dende tan pequeñinos", apuntó Jennifer Alves, madre de la neña. Los trés nun duldaron un intre en fotografiase na propuesta inmersiva de Van Gogh. A pocos metros, Eva Álvarez contemplaba clisada un par de discos que decorara. El Laviada trescala arte per tolos hastiales.
Echaos nuna colchoneta, Hugo Campa, Adrián Martín, Alexia Cortina y Martín Pérez miraben p’hacia riba pa disfrutar con un conxuntu de dibuxos desemeyaos. "Yo pinté unos coches", aseguraba Hugo Campa. Los escolinos nun podíen aparar quietos. Queríen enseña-yos a sos padres tolo que crearen nes aules nestos primeros meses del cursu. Coles mesmes, nestes xornaes de puertes abiertes entamáronse talleres de pintura nos que pequeños y mayores compartieron l’afición pol arte. Emporcar les manes o la ropa yera lo de menos.
Juan Carlos Losada restolaba pente les parés del colexu pa ver la creación de la so afiada, Jesse Anley, de 5 años, que quería caltener el misteriu. "Preguntábemos-y sobre lo que fixera y nun contaba res", bromiaba Losada. Pa él, esta iniciativa ta "mui guai". "Ye interesante que potencien la so espresión artística, y el profesoráu aguíyalos perbién", fixo.
P’Ana Yolanda Flores, esti proyeutu traxo múltiples ventayes pa los escolares. "Desendolquen la so creatividá, pescancien la redolada y refléxenlo utilizando delles téuniques", dixo Flores, pa la que l’alumnáu consiguió "espresar les sos emociones al traviés de la pintura". Un material que tresformó’l colexu Laviada nuna galería d’arte gracies a la imaxinación d’unos nuevos pintores.
- Belén Esteban habla abiertamente de su problema de salud: "Me han encontrado...
- Alerta urgente de la Policía Nacional para quienes reciben estas llamadas de publicidad
- Reacción en Cadena da la sorpresa con el cambio de concursantes: ¿Qué ha pasado con los Mozos de Arousa?
- Oviedo baraja el miércoles o el sábado como días para el futuro mercadillo semanal de la plaza del Conceyín
- Así es la ganadería y la quesería de La Arquera, en venta por falta de relevo: "Está funcionando al cien por cien y es ideal para alguien que conozca el sector
- Supervivientes 2024': Claudia, sexta expulsada y Miri regresa a la lista de nominados con el debut de Torres
- Otro hito para la llegada de los Avril: el primer AVE con pasajeros completa un trayecto Madrid-Asturias en el que "se va muy bien
- Adiós a los Mozos de Arousa: el récord de un equipo de Logroño que ha derrotado a los gallegos