Una llamada a la paz dende Tinéu

Carmen Freijanes y Analía Santos, alumnes de sestu de Primaria del colexu Verdeamor, llevantaron la voz delantre de los sos vecinos de Tinéu pa falar de la importancia de la paz. "Si toos trabayamos xuntos, podemos facer un mundu más pacíficu y feliz. El nuesu oxetivu ye dexar un mundu meyor pa los que vienen detrás, nun lo escaezamos", dixeron los dos escolares, lleendo un testu que representa’l sentir de tola comunidá educativa d’esti centru nel que se formen 121 neños. La llectura d’esti manifiestu foi l’actu central de la tercera marcha "Kilómetru Solidariu", una iniciativa cola que se celebra’l "Día Escolar de la Paz y la Non Violencia", recaudando fondos pa l’asociación Save the Children.

El director del Verdeamor, Miguel Machín, esplica que la iniciativa caltrió fondo nel centru y que tola comunidá educativa se compromete. "A los neños encánta-yos y aprienden una montonera coses, non solo ye garrar y salir de marcha, sinón que primeramente nes aules trabáyense dellos valores", esplica. En concretu, esti añu trabayóse la cooperación, el respetu, la solidaridá, la igualdá, la empatía, la tolerancia y la xusticia.

L’actividá empieza con una marcha d’un kilómetru ente’l centru educativu y la plaza del Conceyu, onde se lleó’l citáu manifiestu y se fixo una plantación simbólica d’un árbol de la paz. Cada neñu llevaba un dosal qu’acreditaba la so participación nesta marcha solidaria qu’ilusiona al Verdeamor.

La mentada plantación fíxose nun tiestu decoráu pa la ocasión pola Asociación de Madres y Padres d’Alumnos (Ampa) del centru públicu cuartanu. Cada grupu asitió nel tiestu una gota de papel col valor que trabayara escritu pa simbolizar los ingredientes que-y faen falta al árbol de la paz pa granar. Dempués, empezó la recaudación solidaria na que podíen participar families y vecinos. A cada persona que contribuyó a la causa solidaria del Verdeamor apurrióse-y un pequeñu tiestu que los alumnos ellaboraron primeramente a lo llargo de les clases de plástica.

Y ye que, según recalcó’l director, el centru lleva selmanes trabayando esta marcha en delles materies como Llingua, Plástica o Música y Educación Física. Nestes últimes asignatures diseñóse la puesta n’escena del cantar "Que canten los neños", qu’emocionó a los asistentes al actu celebráu nel corazón de Tinéu.

"La paz ye cuando toos vivimos n’harmonía, ensin engarradielles, nin conflictos. Ye daqué que toos deseyamos y que tenemos de trabayar xuntos pa llogralo", espresaron Carmen Freijanes y Analía Santos ante la plaza del Conceyu de Tinéu. Nel manifiestu, ellaboráu polos alumnos de más edá del centru, tamién se faló de la importancia "d’aprender a resolver los conflictos de manera pacífica", afalóse la bondá y l’amabilidá como una forma de curiar el planeta.

Los neños de Tinéu tienen claro que la paz "nun ye cuestión d’un día namás" y que tien d’empezar en caún. "Tenemos d’aprender a controlar los nuesos malos pensamientos y atopar l’aselu en momentos d’enfadu y frustración", amiestaron les escolares encargaes de la llectura. El so relatu tuvo tamién una alcordanza sincera "pa toos aquellos países que tán en guerra" y a los que mandaron un mensaxe d’esperanza: "Qu’a toos ellos-yos llégue’l nuesu deséu d’un mundu meyor. Paz pa toos".