El CAI de Pando tien la so “Verdá”
Usuarios del centru llangreanu asoleyen el so propiu periódicu como mediu de comunicación ya integración
Apunten alto. El so próximu oxetivu ye entrevistar a Sara Roces, la delantera del Telecable Xixón de h.oquei sobre patinos que ganó tolos títulos del mundu mundial y que va una selmana proclamábase campeona del mundu. El conseyu de redaición de "La Verdad del CAI", el periódicu del Centru de Sofitu a la Integración de Pando, en Llangréu, yá pidió la entrevista a la campeona, tamién llangreana. En negociación ta tamién la entrevista del presidente del Principáu, Adrián Barbón. "Prestaríanos entrevistar a la Princesa d’Asturies", dicen rescamplaos.
Juan Carlos de las Heras, Alejandro Muñoz, Benjamín García, Charli Simón, Víctor Manuel Martínez y Santi Abreu formen l’equipu qu’entamó’l periódicu, y l’ésitu foi tal que yá tán pensando n’almitir collaboradores espertos, porque munchos compañeros pidiéron-yos poder participar. Pel momentu, nes próximes selmanes van incorporar un fotógrafu y una redactora. Toos tienen querencia pola escritura y participen davezu en concursos lliterarios. Víctor esplica qu’acaba de participar nún "con una poesía de cuando taba namoráu; plaxéme a mi mesmu", esplica. Heras apúnta-y que "nun plaxasti, eso sería si’l poema fora d’otru".
La cuestión ye que nel taller de llectura del CAI propúnxose facer un periódicu y ellí taben ellos pa echalu a andar. Maite Alonso, profesora del centru, y Miguel Ángel Fernández, vecín de Lada que ta metíu en tolos xareos posibles, punxeron manes al llabor y llograron dar forma a la idea. Estos díes preparen un nuevu númberu, nel qu’esperen poder incluyir esa allampada entrevista con Sara Roces y un reportaxe sobre l’asociación de familiares del CAI. Tamién habrá una información bien picardiosa sobre la celebración nel centru del día de San Valentín, esi "Pando dates" que celebraron el 14 de febreru.
El periódicu ye un elementu de trabayu pa los usuarios del centru, una ferramienta pal so desenvolvimientu, pero tamién "una ventana abierta pa que los vecinos de Llangréu y de toa Asturies vean lo que facemos equí", esplica Maite Alonso. "Salir del centru, dir al Ayuntamientu a entrevistar al Alcalde o a una rueda de prensa de la Unión Popular de Llangréu tamién sirve por qu’ellos s’integren na so redolada", fae la profesora.
Heras, espertu en deportes, celebra esa visita a la sala de prensa del Ganzábal. Nada del so equipu-y pasa desapercibío a esti llangreanu que ve "mui entreteníu" el trabayu de periodista. Nel últimu númberu, los usuarios del CAI de Pando entrevistaron al alcalde de Llangréu, Roberto García. "Foi un placer", diz Heras. Les entrugues escoyéronles ente toos y tuvieron que facer una seleición por que’l testu nun enllenara tol periódicu. Una d’eses preguntes, obra de Víctor Martínez, entrugaba al Alcalde sobre la so preferencia profesional: "¿Foi cura, carteru y agora alcalde. En qué oficiu s’afaya más a gusto?". La respuesta ta nes páxines de "La Verdad del CAI".
Mentanto, na xunta mensual del grupu, Miguel Ángel Fernández va faciendo un esquema na pizarra de cómo va quedar el próximu númberu del periódicu, Víctor y Charlie nin dexen d’escribir nos sos ordenadores. "Ye que si pasa munchu tiempu nun m’alcuerdo bien de los detalles pa escribir la noticia", esplica Víctor. Tamién-y cuesta, como a toos, afayase a los espacios de la maquetación. Pa eso tán los editores, Miguel Ángel y Maite, que s’encarguen de "pelar" los artículos de los sos periodistes.
La verdá ye que’l CAI de Pando tien enforma que cuntar y atoparon nel periódicu un mediu de comunicación interna y esterna que los avera al mundu y-yos sirve pa reforzar llazos.
- Alerta urgente de la Policía Nacional para quienes reciben estas llamadas de publicidad
- Así es la ganadería y la quesería de La Arquera, en venta por falta de relevo: "Está funcionando al cien por cien y es ideal para alguien que conozca el sector
- Supervivientes 2024': Claudia, sexta expulsada y Miri regresa a la lista de nominados con el debut de Torres
- Otro hito para la llegada de los Avril: el primer AVE con pasajeros completa un trayecto Madrid-Asturias en el que "se va muy bien
- Adiós a los Mozos de Arousa: el récord de un equipo de Logroño que ha derrotado a los gallegos
- Cambia el servicio de socorrismo en las playas de Gijón: este es el nuevo calendario
- Si eres un amante del buen comer, La Chalana te trae algo que te interesa
- El dinero que pierde Moisés tras ganar el bote de Pasapalabra tras más de 200 programas: "Zafar", la palabra que lo cambia todo