Nun hai ninguna localidá asturiana ente les doscientes con mayor renta media d'España. Tampoco ente les cuatrocientes de menor renta. A priori, nun suena mal: "aurea mediocritas". Asturies fue, históricamente, un país probe y de probetones. Con esa perspectiva, la mediocridá ye un progresu notable, un trunfu.
La mediocridá económica asturiana encontióse, na segunda metá del sieglu XX, nos sueldos rotundos d'obreros especializaos. Con despreciu olímpicu, el postproletariu ensin fame astur marcaba les diferencies col insolvente ("¡folganzán!") y despreciaba les que lu apartaben a él del ricu ("¡bandíu!"). L'obreru satisfechu, con bon contratu y ensin preocupaciones económiques, fue la figura emblemática d'aquelles décades del desarrollismu tardofranquista y, ya con un poco de tembladera, de la democracia primeriza. La metamorfosis en pensionista nun vieno acompañada de grandes sustos nin de penuries y l'escalafón publicáu pola Axencia Tributaria esta selmana confirma qu'esi pulmón tovía alienda: en materia de rentes, ente los conceyos d'arriba siguen los de les cuenques mineres y les ciudaes del centru a les qu'emigraron munchos prexubilaos del carbón, supervivientes. A la cola, en cambiu, el monte, el prau y la vaca: Bual, Cabranes, Casu, el Valle Baju de Peñamellera, Somiedo y Villayón.
Pero'l protagonismu futuru del monte y del prau paez inevitable. Albidramos l'estrenu de "L'aldea realcontrada" (prósimamente, nes sales más ruinoses). El paréntesis históricu que supunxo la gran industrialización d'Asturies quier dir dando les boquiaes. D'un llau, y depués de muncha escandalera, los sindicatos de la minería firmaron en Madrid, el miércoles, un sálvese quien pueda col ministeriu del ramu que ye la triste carta de despedida al mitu de l'Asturies dinamitera, en realidá difunta va cuántaya; d'otru, Alcoa anunció'l cierre de la so fábrica d'Avilés (cierre pal que'l presidente de la patronal asturiana, Belarmino Feito, pide respetu: da igual les bonificaciones públiques de les que se benefició l'aluminera años pasaos: tolo que lleve'l capital priváu ye indoloro), enésimu episodiu del apagón industrial en cursu. Y ún dulda de que la razón última sea la cacarexada inseguridá eléctrica que'l coru empresarial predica, Feito con voz solista. Estes multinacionales siempre van atopar un país en desarrollu (¡qué eufemismu!) con mano d'obra, tan cualificada como la d'equí, dispuesta a aceptar condiciones laborales prósimes a la esclavitú poles que, de momentu, nun pasen los obreros asturianos. ¡Allá ellos!, pensarán en Pittsburg (PA).
Pa ser esclavu n'Asturies, nun tenemos falta de modelos foriatos, bengalinos o indios. Tenemos equí'l d'Antón de Chinta, que ya vuelve camín de la corte, arrastrando los pies, a por la vaca Cordera, pa llevala al mercáu del Humedal con gran dolor del corazón. ¡La miseria puede ser tan melodramática y conmovedora cuando se pinta ente praderes y altos! Bual, Cabranes, Casu, el Valle Baju de Peñamellera, Somiedo, Villayón... Llangréu, Aller, Mieres, Samartín del Rei Aurelio, Llaviana...
miliorodriguezcueto.wordpress.com
