1.- Un día d'estos d'atrás, fixi la ruta de les Foces del Esva. Nun me crucé con naide nes tres hores y media que me llevó, la metá d'elles echando'l fégadu pela boca cuesta arriba. Eso (lo de la caminata solitaria) ta bien, pensará usté: ¡qué prestoso disfrutar de la naturaleza n'esclusiva, con privilexos espurios de terrateniente! Nun crea: fue una angustia tol ratu. Cada vez que ruxía'l felechu, telón de cualquier llargatesa escapadiza, yo volvíame sobresaltáu cuntando con que, de detrás d'un matu d'árguma, diba saltame al camín Adrián Barbón, el presidente astur, apuntándome con un deu acusador y reñéndome:
-¿Ú la mascarilla?
2.- En Xixón festexaron al anterior presidente, Javier Fernández. Acudieron amigos d'extrapicos, como'l titular del gobiernu d'Aragón, Javier Lambán, qu'emponderó a Fernández nestos términos: "Es culto. [?] Ha leído mucho y cuando habla se le nota." Al lleer estes declaraciones na prensa, apoderóseme del corazón una ternura compasible pa col pueblu aragonés. ¡Ánimu, maños! Notros tiempos, los ciudadanos teníen el vezu d'inmortalizar al soberanu con un nomatu precisu, afiláu. Nos años primeros y anodinos del javieratu, habíalos que-y quinxeron poner "el Mudu". Depués vieno'l fiascu aquel de querer pintar na política estatal, que dio idea de les dotes visionaries de Fernández pero, polo menos, rescatolu de la mudez. Si por Lambán ye, ya sabemos que'l nomatu de Fernández, pa la historia, diba ser Javier "el Cultu". A mi vienme a la cabeza una anécdota del institutu onde trabayo. Teníemos un estudiante alemán d'intercambiu. Un profesor fexo por comunicase con él n'inglés delantre'l restu la clase. Cómo sería la cosa, que los alumnos punxéron-y al profe "el Bilingüe". Pues "mutatis mutandis".
3.- Mientres el PP casturianu, consecuente col so ideariu, pide perres pa la escuela concertada (que ye decir pa la escuela católica), la conseyería d'Educación sigue redactando instruciones (siempre penúltimes) pal cursu por venir en setiembre. Nun borrador que presentó , estos díes, a los sindicatos del ramu, propón menguar diez minutos cada clase. Yo nun sé en qué manera eso combate l'andancia del virus: igual ye que'l bichu espera a los diez últimos minutos de Mates o d'Inglés pa blincar d'Ailara a Cristopher (¿Crístopher? ¿Cristópher?), quésiyo. Tamién pue ser que, minutu a minutu, "tacita a tacita", pueda aforrase en contrataciones de profesoráu. Otra novedá: los comedores van "zonificase" y, si hai pocu sitiu, van facese turnos, ún d'ellos pal "alumnado de familias económicamente desfavorecidas". Vamos, concentrando a los probes:
-¡A ver, que pase'l turnu Oliver Twist!
Más: "En todos los cursos habrá grupos estables. Eso significa que los alumnos de una clase no podrán entrar en contacto con los de otras." Amás, a los recreos, diz la conseyera que los centros docentes van tener que zonificar el patiu, o incluso sacá los rapacinos a esparcer n'horarios distintos. Too eso, hasta'l final de les clases, evidentemente. Depués, pela tarde, ya van toos xuntos a les academies particulares, a entrenar col equipu de fútbol, a enrollase nel bancu d'un parque públicu o a fumar unos porrinos. ¡Que rule!
