Suscríbete

Contenido exclusivo para suscriptores digitales

Milio Rodríguez Cueto

esti güevu sal quier

Milio Rodríguez Cueto

Los cuatro palos

“Bolero”, el supremacismu, el Día del Llibru y la fosa del Rellán

Oros

“Bolero”, un güe roxu de 800 kilos, sobrevoló la costa gozoniega casi al tiempu que los chinos llanzaben el módulu central de la que va sé la so estación espacial: Asturies compite tamién na conquista del espaciu. “Bolero”, según declaró a los medios, pastiaba atontolináu cuando cayó rodando, cantil abaxo, pa la playa La Carnera. Recebáu en sableru, namás con llevantá la tiesta pal cielu y mirá la cuesta que tenía que subir pa tornar pa los praos familiares, dába-y tanta vagancia que-y apetecía más echase a esperá la marea. Presentose al rescate un despliegue d’esos mamíferos menuducos, los seres humanos, con máquines voladores y la de su madre. Pasáron-y un arnés pela tripa, con cuidáu de nun-y afectá les partes nobles que son el so modus vivendi, y subieron con él pal cielu. El pilotu del helicópteru debía ser bona xente porque, según se ve nel video, garró’l camín más llargu, dando una vuelta percima playes y cantiles, pa instrución y distración de “Bolero”, primero de posalu en verde. La ocasión y el personaxe merecíenlo. ¿Cuántes veces desciende Zeus n’Asturies?

Bastos

La Xunta Xeneral vuelve a facer el ridículu a cuenta del bable. El bloque nacionalista de la cámara (PP – Vox) quier torgar el so usu porque dicen que nun lo entienden. L’asturiano nun ye vasco nin húngaro. Un castellanoparlante, natural de La Gomera por poner un casu, acabante llegar a Asturies y d’intelixencia normal, nun echa más de tres meses n’entendé l’asturiano estándar, tan llenu como ta de cultismos que lu asemeyen al español. Los nuestros representantes autonómicos lleven nel Parlamentín, el que menos, dos años, y nesti país munchos más. Pero, por si algún nun cumple lo de la intelixencia normal, en bolsu lleva un teléfonu, y en teléfonu un navegador, y col navegador puede aceder al Diccionario General de la Lengua Asturiana de la web d’esti mismu diariu. Pongamos qu’un colega parlamentariu diz “facer” y el de Vox o la del PP nun lu entienden. Pues, con un dedín, calquen nel buscador DGLA: efe, a, ce, e, erre… “Buscar” ¡Y ya ta! ¡“Facer” significa “hacer”! ¡Arreglao! Otra cosa ye que los refugantes mientan cuando dicen que nun lo entienden, o que nun lo quieran entender arremente. A esa disposición, evidentemente reprobable pa cualquiera que representa al conxuntu de la población asturiana, hai que-y poner nome, y yo voi pedí-ylu, n’empréstitu, al profesor Ramón d’Andrés: supremacismu lingüisticu.

Copes

Anque ya pasó una selmana, déxeme usté volver al 23 d’abril. Con motivu del Día del Llibru, l’alcalde d’Uviéu, Alfredo Canteli, declaró a la prensa: “Consumir libros es muy importante.” L’infinitivu dizlo too del home. Dende esi puntu de vista, ¡qué superior ye un gin-tonic a un llibru! El gin-tonic tien un únicu consumu posible, mueve más mercáu, ¡ónde vas a parar! El llibru, si se-y da l’usu pal que se pensó, nunca se consume, siempre ta por estrenar pa la mano que lu garra una primer vez. “Consumir libros es muy importante.” Grandes momentos históricos del consumu de llibros: 7 de febrero de 1497 en Florencia, 10 de mayo de 1933 en Berlín, 30 de abril de 1939 en la Universidad Central de Madrid… ¡Ai, qué grandes consumidores de llibros, el cleru, los nazis y la Falange!

Espades

De la fosa del Rellán, en Grao, van sacando güesos y bales, íntimamente xuntos. Va muncho d’aquelles execuciones y, por desgracia, la tierra que conserva güesos nel interior nun ye quien a guardar, fuera, nel verde, los rastros de los que dispararon pa que pudiéremos saber qué camín siguieron aquella nueche, con qué pasu tranquilu volvieron pa casa colos fíos y la muyer, o pal cuartel, o pal chigre, o pa la casa putes…

miliorodriguezcueto.wordpress.com

Compartir el artículo

stats