Juan Luis Rodríguez -Vigil, el presidente que nun vio venir el Petromocho, ye clarivente, en cambiu, pa columbrar una pila molesties que, según él, va traer la cooficialidá a Asturies. Diz que, aprobada la llei, obliga a los ciudadanos, ¡importante recordatoriu! Según él, hasta los detractores del idioma astur “tendrán que saberlo, utilizarlo y hasta estudiarlo para infinidad de ocasiones”. Nun ye verdá. La Constitución, que ta percima cualquier llei estatutaria, dicta, nel artículu 3, el derechu de tolos españoles a espresase en castellán: “El castellano es la lengua española oficial del Estado. Todos los españoles tienen el deber de conocerla y el derecho de usarla.” Sigue Rodríguez-Vigil avisando que va facer falta pa opositar. Eso tendrá que lo definir la llei posterior. De momentu, Adrián Barbón paez que nun ta por ello. De toles maneres, igual hai que-yos preguntar qué opinen al respectu a los opositores asturianos, que nun se pueden presentar en Galicia, Euskadi, Navarra, Cataluña, Baleares y Valencia, y que, a cambiu, reciben competidores que vienen de toa España (con tol derechu, por supuesto) a disputar les places que convoca l’administración pública asturiana. Si la metá’l país xuega con un as (lingüísticu) na manga y la otrá mitá non, hai que pensar de que llau interesa tar teniendo los medios pa escoyer. Dende esi puntu de vista, igual la cooficialidá ye una manera de combatir la emigración de la mocedá y el despoblamientu. Otra de Rodríguez-Vigil: l’aprobación de la cooficialidá por un votu diba ser “precaria”. Fállen-y les matemátiques. La Xunta Xeneral fórmenla 45 parlamentarios. Precario podía ser cuntar con 23 votos a favor, lo mínimo percima la metá. Pero de lo que se ta tratando ye de 27, los 3/5 de la cámara. ¿Eso ye precariedá? Y remata’l gurú que refugar el referendum ye “contrario al más elemental espíritu democrático”. Venga: pues tolos parlamentarios pa casa. Nun nos faen falta pa nada representantes nin eleciones cada cuatro años. ¡Acracia! ¡A votar toles lleis! ¡La del matrimoniu gay, la de les últimes voluntaes y, ya pa dientro Asturies, la denominación de Principáu de la comunidá!, ¿cuándo se nos entrugó si queremos príncipes o princeses? Porque, digo yo, que nun se tratará de reclamar referendum namás cuando, cuntando con una mayoría cualificada y el respaldu de la normativa legal correspondiente, da la impresión de que se va aprobar una norma que nun-y gusta a Rodríguez-Vigil. Un parlamentariu asturianu de Ciudadanos esplicábame, nes redes sociales, que nun se puede comparar la demanda de referendum del independentismu catalán, porque ye inconstitucional. Y ye verdá. JuntsxCAT, Esquerra y les CUP piden consulta popular porque la legalidá nun-yos da pol gustu. ¿Y nun ye idénticu’l casu de los que la reclamen sobre la cooficialidá del asturiano? La legalidá capacita a la Xunta Xeneral pa reformar estatutos en determinaes circunstancies. “¡Ah, non, que nun me presta lo que va salir! ¡Referendum!” Esi pensamientu ye’l de Puigdemont, por poner un casu, guste o nun guste.
Estes argumentaciones y contrargumentaciones (la qu’usté me ta aguantando a mi, la de Rodríguez-Vigil) son tiempu perdío. A la cuestión de la llingua, enfrentámonos toos con una postura emotiva construida a priori por una biografía familiar, un sentimientu de la tierra, un historial d’agravios o una nube de mieos, y nun hai esbrozadora intelectual qu’abra esos matos. El tiempu será’l que lo esclarie too, si la cosa va p’alantre. Pero de los que fueron altos representantes de la ciudadanía, como Rodríguez-Vigil, espera ún daqué, un plizcu perspicacia política, y paez que’l presidente del bieniu petromochil sigue andando escasu d’ello. Entamar un referendum sobre la llingua ye’l meyor regalu que’l socialismu astur-y podía facer a la derecha española. Casado, Abascal o Arrimadas diben montar campamentu per equí pa escribir nuevos apocalipsis del Estáu español a cuenta de la llingua, y non porque los esmoleza’l drama del polesu o la candamina que sienten les noticies de la TPA en bable, sinón pa sacar réditu electoral onde de verdá-yos importa: en Madrid y per ende acullá. Asturies diba ser campu de batalla pa una guerra esterior cola que namás puede ganar la oposición de Pedro Sánchez, que yo pensaba que yera’l secretariu xeneral del partíu nel que milita Rodríguez-Vigil. Pero, en fin, ¡vense tantes inconsecuencies, vanidosos buñuelos de vientu político!
miliorodriguezcueto.wordpress.com
