La panera

Un mundu que yera altu, luminosu esbeltu

Naciente y fonte y vocación de ríu

Onde los homes callen y el silenciu ye renuncia

Onde escaecimos el ser

Onde claudicamos

Un país onde la casa cai cai l’horru la ponte

El molín la ilesia l’home tamién cai

Inmediata y irremediablemente veníen esti día a la mio alcordanza estos versos de Xuan Bello. Versos guapos y, a la par, señardosos; seña identitaria na escritura del que fuera en 2017 el nuesu I Premiu Nacional de Lliteratura Nacional. Versos qu’aprucieron nel mio maxín al instante, tres ver nun videu que corrió peles redes cómo los dientes d’una escavadora tragaben una panera en Salas.

Cai la casa, cai l’horru, los homes y les muyeres tamién caen…

Cai l’horru. La pesca y l’agricultura y ganadería foron, respeutivamente, la primer y la tercer actividá llaboral onde l’emplegu cayó más nel últimu ciclu estudiáu pol SADEI, el que cinca del 2020 al 2022. El nuesu seutor primariu sufre un esbarrumbe imparable dende qu’esti organismu ufre datos sobre esa cuestión. Si en 1980 la pesca y l’agricultura daben trabayu a más de 77.000 homes y muyeres, anguaño son poco más de 12.000 les persones que viven de la mar y del campu. Caen con esos seutores el nuesu entornu rural, el nuesu paisaxe natural, les nueses tradiciones, la nuesa posibilidá de caltener un soberanismu alimentariu… Cae too ello mentanto medra ensin llende una hostelería promovida por un modelu de turistificación xabaz y homoxeneizador que namás s’alcuerda de les nueses señes d’identidá pa facer chancia d’elles, como víemos con vergoña va dellos díes naquel tren con destín a Xixón.

Cai la casa, cai l’horru, los homes y les muyeres tamién caen…

Caen los homes y les muyeres. L’escalabru de la nuesa demografía ye alarmante. Si nel añu 1976 Asturies cuntaba con más de 1.100.000 habitantes, güei la nuesa población amenaza con baxar de la barrera del millón. Asturies ye la comunidá con mayor media d’edá del estáu español y la que, con diferencia, presenta un menor índiz de natalidá. A estos datos hai que-yos sumar l’impactu del éxodu xuvenil, una constante nel nuesu país: según informaba La Nueva España nos caberos meses del 2023, nes dos últimes décades perdimos a la metá de la mocedá comprendida ente los 20 y los 40 años, que coló a otros territorios a la gueta de trabayu. El datu asusta, pero nun estraña nuna Asturies onde la emigración moza se vendió como un sinónimu d’ésitu y los gobiernos s’esforciaron en facilitar más medios y más veloces p’abandonar el país. Si les cifres d’éxodu xuvenil esmolecen y manquen, más lo faen entá los datos de suicidiu. Nesto, por desgracia, Asturies tamién ye líder al encabezar la tasa española: la estadística diz que 3 persones acaben cola so vida cada selmana na nuesa comunidá.

Cai la casa, cai l’horru, los homes y les muyeres tamién caen…

Cai la casa. La perda demográfica ye sinónimu de despoblamientu del nuesu territoriu. De media, un llugar queda abandonáu cada mes n’Asturies no que llevamos andao de sieglu acordies colos datos amosaos pola prensa nel añu 2022. Nesi momentu, y dende qu’aniciara esta centuria, yeren 811 los llugares que vieren morrer o colar al so últimu habitante.

Coles mesmes, l’amenorgamientu poblacional ye sinónimu de perda d’influyencia y pesu políticu. Asturies ta na actualidá infrarrepresentada nel parlamentu español y perdió dende l’apertura del réxime democráticu tres diputaes/os.

Cai la casa, cai l’horru, los homes y les muyeres tamién caen… Caen, déxenlo cayer… y lo qu’aguanta, váltienlo. Ye’l resultáu d’unes polítiques al debalu coles que por más de 40 años tienen a Asturies desnortiada. Unes polítiques que, ensin interés nin respetu pola nuesa historia, desanicien lo que somos y, ensin proyeutu dalu de país, dexen al so pasu solares ermos. Polítiques cortoplacistes, probetayes, teleridixíes y desenvueltes por políticos esmolecíos por caltener el pelleyu o acomodalu nun asientu ministerial en Madrid. Polítiques que dexen cayer la casa, que dexen cayer l’horru, que dexen cayer a los homes y a les muyeres, que dexen cayer la nuesa esperanza y el nuesu futuru. Polítiques que faen d’esta Asturies con vocación de lluminosu ríu, regatu buxu, tapecíu y secu.

Préstenme los versos de Xuan Bello, guapos y señardosos como son. Tamién, ciertamente, críticos. Sicasí, intento nun quedar munchu tiempu rumiándolos pa nun cayer, yo con ellos, nel abatimientu. Porque nel fondu tamién sé qu’hai equí homes y muyeres por miles que nun callen nin abracen el silenciu con resignación. Porque sé qu’hai homes y muyeres por miles que llevanten nesta Asturies d’anguaño cases y horros nuevos a cada pasu: devolviendo la esperanza, faciendo medrar la estima, alzando pontes hacia un mañana meyor y más xustu. Inmediata y irremediablemente viénenme entós aquellos otros versos de Xuan Marcos que Nuberu ficiera populares hai yá 50 años, cuando too echaba a andar:

Xorrecíes tán les manes, xorrecíu va El Nalón,

faigamos un ríu toos coles manes del mugor.

Suscríbete para seguir leyendo