Una de les principales torgues pa los críos que falen asturianu nes ciudaes d'Asturies ye que, davezu, nun tienen accesu a ambientes asturfalantes aculló de la familia. A esto, qu'asocede asina pola mor de la mayor perda de la llingua asturiana nos entornos urbanos, quier poner igua dende 2014 l'asociación Reciella-Families pol Asturianu.
Con esti enfotu nació la Escolina de la Reciella, que dende hai cuatro años fai por que les escolines y escolinos de llugares como Xixón, Uviéu o Carreño practiquen l'asturianu con neños del mesmu tiempu qu'ellos al traviés del "xuegu y l'aprendizaxe manipulativu y por descubrimientu".
Nella pon escuela Laura Peláez Méndez, que según diz a Escolinos, tuvo venceyada al proxectu dende l'aniciu y vio'l so progresu demientres estos cuatro años: "pasemos de xuntanos naquella primer Escolina con poquitinos neños y neñes de distintes edaes, dos maestres xuntando recursos d'infantil con un poquiñín d'imaxinación. Agora tenemos tres grupinos con edaes estremaes y colos sos propios conteníos adautaos a elles".
D'esti mou, y acompañaos por dos maestres especializaes, los críos de la Escolina pasen una hora a la selmana pela tarde xugando, falando asturianu y deprendiendo, o lo que ye lo mesmo, conociendo'l mundu. Ponse munchu enfotu en que los escolinos y escolines pasen "un momentu divertíu mentes falen y sienten falar n'asturianu", yá que según diz la so maestra nun se pretende poner escuela de llingua como lo faen en colexu, sinón que ye "una xuntanza de collacios que descubrimos el mundu xuntos y cuntámonos coses na nuesa llingua".
Actualmente la Escolina cuenta con tres grupos con guah.es d'edaes estremaes, ún d'ellos creáu esti mesmu añu: los más pequeños, "los ñacarinos", van cola maestra Olaya "y ye too peresperimental, d'esploración y descubrimientu del entornu". Lo mediano, que ta nel primer y segundu cursu d'infantil, "trabaya conteníos de la etapa (conteníos, colores) pero con munchu xuegu, porque equí venimos pa disfrutar del asturianu y pasalo podre".
Finalmente, el grupín que yá ta en Primaria ta percorriendo'l mundu xunta Laura, que ye la so maestra, col proxectu "L'asturianu ye mundial" y según afirma Laura, "la verdá ye que-yos ta prestando pola vida, y a mí más entovía".
L'actividá ye financiada íntegramente poles families, que valoren non namás tolo que deprienden los neños, sinón que lo pasen mui bien: "esti añu tán funcionando que ye una maravilla velos, y aorten ellos idees pa facer o coses que traen de casa, cosa que ye xenial porque Reciella ye énte too familiar y asina tamos toos involucraos".
