Esti sábadu 15 d'avientu, nel Cine Marvi de Tinéu, van aconceyar los escolinos de la Escuela Municipal de Música, del grupu de Bail.le y Banda de Gaitas Sulabarda y de la Escuela de Tonada ya Canción Moderna Marisa Valle Roso p'amosar lo que faen meyor: música.
Nesti actu, qu'esti añu va ser benéficu pa cola Asociación de Síndrome de Down d'Asturies, van poder vese escolinos de toles edaes, anque la gala ta centrada sobre manera nos críos, según declara a Escolinos Rosa Fernández, directora de la Escuela Municipal.
En Tinéu, como en munchos otros llugares d'Asturies y especialmente del suroccidente, tien garrao nos años caberos munchu puxu la música tradicional, y la enseñanza nun remanez ayena a esti fenómenu.
L'estudiu de los cantares de los nuesos entepasaos ye una bona midida pa vehicular l'aprendizaxe de la llingua asturiana, y son munchos los escolinos que garren asina conciencia llingüística.
L'asturianu tien un papel bien importante na configuración de la enseñanza de música, como demuestra'l programa de la gala. D'esti mou, los escolinos lleven la llingua asturiana aculló de les sos clases en colexu, faciendo por espardila a otros ámbitos de la so vida.
Nel actu, entamáu pola Escuela Municipal xunta l'Asociación de Padres, el Grupu Sulabarda y l'Ayuntamientu de Tinéu, van participar tamién la Bandina los Eólicos, el Grupu de folk asturllionés D´Urria y la banda de Gaitas Marino Tapiega.
