Montserrat Machicado, directora de la Estaya de la Llingua d'Avilés, tienlo mui claro: conocer y falar l'asturianu ye imposible ensin conocer la cultura asturiana na que la llingua ta entemecida. Asina, Machicado afirma a Escolinos que "la normalización del asturianu y el conocimientu de la cultura son imposibles de separtar, una bebe de la otra y la otra d'ella. Asocede cola asturiana y con toles cultures del mundu".
Quiciás esa sía la razón pola que dende la Estaya de la Llingua entamen actividaes como las que van tener llugar esti mes de mayu: una visita guiada al parque Ferrera pa los escolinos del CP Enrique Alonso cola participación de les actrices Ana Morán y Olga Cuervo; un taller pa neños de 6 a 10 años que dirixe Borja Roces y nel que se fai por que los rapacinos sepan comer bien y sano; y la obra Hansel y Gretel, que va representar "Higiénico Papel Teatro" dientro del ciclu La Reciella de la Factoría.
Na visita al Parque Ferrera -a la que tovía podría sumase daqué escuela más- Ana Morán y Olga Cuervo, antroxaes, van desplicar dende un puntu de vista etnolóxicu la importancia d'árboles con munchu valir pal sistema cultural y económicu asturianu, como'l texu, el carbayu, l'ablanal, o la castañal. Esta actividá, que se realiza per segundu añu (l'añu pasáu foi colos escolinos de La Carriona) tien como oxetivu, según Machicado, "normalizar la llingua a un nivel educativu", y emplegar l'asturianu como "llingua vehicular" pa conocer la cultura y el padremuñu de la ciudá.
Otra mano, Borja Roces va llevar esti vienres 10 de mayu'l taller "Naguando polo sano" en Los Canapés (Cai de la Concordia, 1), cola collaboración de la Fundación Municipal de Cultura. Nel alcuentru, que va ser de les 17.00 a les 18:30 hores, les rapacines y rapacinos que s'averen van facer dibuxos, cantar y xugar nuna actividá col envís de que la comida que coman sía sano.
Pa rematar, el día 24 de mayu na Factoría Cultural (Av. Portugal, 13), la compañía Higiénico Papel Teatro va representar de magar les 19:00 hores el so Hansel y Gretel, col que tienen ganao el Premiu Nel Amaro de Teatru Profesional en Llingua Asturiana en 2018. Esti actu pieslla el ciclu La Reciella de la Factoría, que traxo a Avilés dellos espectáculos musicales, lliterarios y teatrales na so llingua materna a neños de toles edaes.
