Eva González Fernández (Palacios del Sil, 1918-ibidem, 2007) foi una de les primeres muyeres escritores n'asturianu, perteneciente a la llamada Xeneración de la Posguerra. L'autora palaciega usó con normalidá la variante llingüística de la so fastera pa producir un corpus lliterariu mui estimable en calidá y variedá. Poeta y narradora mui apegada a la naturaleza y a la tradición, ye dueña d'un estilu y d'un llirismu elegante y señaldosu, intensamente caltriáu pol so entornu vital. Sabíase dende hai años de la esistencia d' Hestoria de la mia vida, unes memories que fueron axeitaes con tientu y dolor y que la escritora encamentó que fueren publicaes solo después de la so muerte. Na so primer parte, el relatu céntrase nos años d'infancia y mocedá d'Eva y na segunda, nes dramátiques consecuencies que la guerra traxo a la so familia. La presente edición va introducida pol "Entamu" nel qu'I rma González-Quevedo Pedrayes fai una semblanza de la güela y la escritora, amás d'esplicar les cuestiones referentes a la xénesis testual. El manuscritu orixinal foi dividíu en catorce capítulos y ampliáu con notes aclaratories por Roberto González-Quevedo González, fíu de l'autora. Ofrécense tres versiones: la escrita por Eva González, la que s'adaptó a la normativa ortográfica y una traducción al castellanu. El conxuntu arriquezse asina nun triple interés lliterariu, filolóxicu ya históricu.
Como nún de los sos cuentos, un narrador en tercera persona arranca la hestoria, esta vez verdadera, nuna nueche d'iviernu. Basten unes llinies pa qu'Eva González consiga que'l llector ande pente la nieve de Palacios nel momentu nel qu'ella nació. A partir d'ehí vien una crónica amable de los felices años d'infancia, de l'harmonía de la so familia trabayadora, la tenrura del padre severu y la etnografía del entornu humilde. Cola habilidá de los bonos contadores, con trabayada cenciellez, con bayura de léxicu, va filando dalgunes anécdotes vitales que resultaron decisives na formación de la so personalidá y apontonaron un caráuter valiente, decidíu, con inquietúes culturales. Y entós llegó'l destín tráxicu impuestu a tantos homes y muyeres, especialmente azarientu na vida d'esta moza qu'aprendía pa modista. La hestoria cambió dafechu cola guerra y el llector ye espresamente alvertíu de la gravedá de los fechos que se van a contar. Prudente, igual que lo tuvo que ser naquel entós, decide nun marcar a naide con responsabilidaes, pero sí se propón conseñar a la bona xente que los ayudó, sí restituir l'honor familiar que dalgunu quixo manchar. Alcuérdase d'un día d'ochobre de 1934, cuando diba coles vaques pa un prau y vio pasar p'Asturies un avión y munchos camiones llenos de soldaos; y d'aquel día de xunetu, cuasi dos años después: "Nós andábamos a la yerba, como tou el mundu, cuando se supo qu'estal.lara un golpe militar [?] Desde esi día 18 de santamarina la mia vida ya la de los mieus foi muito triste ya dura". Darréu toparon la casa arrasada y afuxeron del llugar nun peregrinaxe que los llevó a escondese nos montes de la redolada primero, onde vivieron con terror l'acosu de los falanxistes: "Tous los gamachos nos paecían falanxes", y n'Asturies y Santander después. Anque tol testu rezusmia contención nes emociones vivíes, hai munches escenes que describen momentos y situaciones angustioses. El relatu solo se zarra en 1939, cuando vuelve a Palacios el padre enfermu qu'acaba de salir de la cárcele y a quien tola familia va arropar con un amor infinitu. Acaba asina un testimoniu qu'Eva González terminó d'escribir en 1988, cola perspectiva que-y dio'l pasu del tiempu, col oficiu que tresformó la vivencia en lliteratura emocionante y que seique resultó una confesión necesaria y lliberadora, que valió pa quitar daqué de pesu al alma que quedó conmocionada pal restu de la vida.
