L'últimu premiu Asturies Xoven de Poesía, na so edición de 2019, nun ye nuevu n'espublizar y tien una carrera poética curtia pero sólida, con apuestes siempre personales y con aldu posmodernu ensin que los afixos definan nada acullá de la so propia orixinalidá. Miguel Rodríguez Monteavaro firma superpoderes, asina en minúscula, titúlase lo ta acabante de salir del autor de Bual. Entama con un refrán popular (mal citáu, lo correcto ye "onde lletres falen, barbes callen") y unos versos de Sergio Gutiérrez Camblor. Esto yá avisa que tenemos un poeta que camina ente la tradición y la modernidá, y que quier que la esperiencia gobierne sobre les grandes pallabres, masque sía más bien que la hestoria consiste en rellatos, como entendieron de mano Clifford Geertz y los antropólogos posmodernos (yá vuelve salir la dichosa pallabrina). De contino, lleemos un prólogu del propiu poeta nel qu'esclaria les claves y nicios escondíos nestes páxines. Nun sobra'l prólogu nin fai falta esclariar nada. Con intelixencia y soltura va Monteavaro esmigayando los males qu'al so entender afaren la vida anguaño.
Formalmente, superpoderes escueye la omisión de mayúscules como puerta visual a un fondu de sinceridá cercana y humilde, pequeña. Atopamos asina una voluntá narrativa que xuega al doble entendimientu y a la elipsis. Cada silenciu, cada furacu na imaxe poética, concluye más que la evidencia de les pallabres clares que l'autor remana. superpoderes va presta-y al llector avezáu de poesía y al recién llegáu al xéneru o la llingua asturiana. Fala con pallabres pequeñines de coses grandes como la vida diaria, corriente y ordinaria: "nunca escuché a mio güela / dicir / les palabres / estaos xuníos / ciudadanu / crisis. // tampoco la escuché nunca / quexar". Reconozse nos demás que lu arrodien: la güela, l'amigu, el gatu, el pá... Y nesa colectividá alcuentra la gasolina afayadiza pa facer furrular el motor de les reflexones y los versos. Na primer parte del llibru, el poeta apela al conxuntu, busca lo colectivo pa entender el mundiu onde habita. Un mundu rural que nun siente apreciu por sí mesmu: "por eso hai que cambiar coses y dexar / unicornios y tricornios / nel mesmu armariu". Y amesta: "nos díes que cuerren ye imprescindible / ser conscientes de / contra qué nos queremos rebelar". Pa camudar el mundu, Monteavaro mándase de los defectos de los superhéroes. Non de les virtúes, non: de los fallos, de lo humilde, de lo humano.
Na segunda parte del poemariu, el poeta yá capia dafechu a la sociedá. La precariedá llaboral nun ye una opción, sinón una imposición magüeta, dolorosa ya inevitable que la sociedá capitalista nos impón. Pero nun ye una sociedá cualquiera, ye l'asturiana, cola so imaxe particular y especial, col paisanaxe que la integra con peor suerte qu'aciertu, caldu de tristures onde a Monteavaro-y tocó nacer y d'onde saca les fuercies pa los versos y pa siguir (sobre) viviendo. Nun ye conciliador y critica esta Asturies cuando hai que criticala. Non por mala zuna. Sinón por amor, al aviesu de lo que pue pensase: "toos me dixeron que nun podía criticar la casa, / que tenía coses bones tamién. / y yo respondí / que si les coses bones son los tópicos de la ruralidá que vendemos na fitur, / meyor / prendíemos fueu a too". Ante esta situación, la narrativa poética de superpoderes lleva al personaxe-poeta a una sobrevivencia "a pesar" de la sociedá. L'asturiana ye una comunidá humana de contradicciones que paez que nunca respuende a lo que'l mundu esixe en cada intre. Vivimos desaxustaos y l'escritor paez que nun se dexa vencer por ello: "espera, nun salgas el primeru, calcula / los pasos hasta'l precipiciu". Monteavaro va consiguiendo superpoderes poéticos en cada entrega.
