Blog 
Filazón
RSS - Blog de MªEsther  García López

Archivo

  • 08
    Marzo
    2017

    Comenta

    Comparte

    Twitea


    Oviedo
    asturias

    Polos nuesos derechos

    Polos nuesos derechos

     María esther garcía lópez 08.03.2017 | 03:53

    Polos nuesos derechos
    Polos nuesos derechos

    Fai falta una reorganización del mundu llaboral pa poder algamar los nuesos derechos como muyeres.

    Un añu más celebramos el Día Internacional de la Muyer trabayadora. Ye importante qu'un día al añu sirva de recordatoriu, de reivindicación pa consiguir los nuesos derechos como seres humanos. Pero ye cada minutu, cada día, cuando tenemos que lluchar. Fáltanos nesti sen munchu camín por andar.

    Nos primeros rellatos o mitos de la creación lléganos la sorprendente historia de Lilith, que pue considerase como la primer muyer que reivindicó los nuesos derechos frente al varón.

    Según una lleenda de la tradición xudía, la primera muyer d'Adán foi Lilith, creada de la tierra como él y nel mesmu momentu. Pero paez ser que foi la collacia d'Adán por pocu tiempu. Lilith negóse a los propósitos d'ésti de gociar del so cuerpu sometíu y quixo disfrutar de la igualdá de derechos col so compañeru. Adán negóse, pero Lilith nun cedió a los sos deseos y fuxó del Edén. Como "nun ye bono que l'home tea solu", darréu ye reemplazada por Eva, creada por Dios d'una costiella d'Adán, débil y sumisa. La lleenda convierte a Lilith nun ser demoníacu ya inmortal. Y dende aquello ye una demonia que caleya pel mundu. Nun importa pa nada lo que tenga de cierto esti rellatu llexendariu. Lo qu'importa ye que la lleenda ye una prestosidá y que'l mundu ye machista dende la creación, pero que tamién tenemos dende aquel momentu una muyer d'armes tomar que se revela y nun se dexa someter.

    Dende'l comienzu del mundu, munches muyeres valientes reivindicaron los sos derechos. Tuvieren que pasar sieglos p'algamar ciertos llogros, non ensin correr riesgos, munches con peor suerte que la mítica Lilith, porque tuvieron que pagar coles sos vides la defensa del xéneru femenín.

    La muyer va llogrando distintos graos d'emancipación, sicasí, güei, el trabayu fuera del llar inda supón pa nosotres una sobrecarga por tener que compartilu cola organización de la casa y l'atención de la familia en tolos ámbitos.

    Nesti sen, habría que pensar en midíes sociales que facilitaren el nuestru accesu al mundu llaboral, n'igualdá de derechos que los homes.

    Llegó otru momentu históricu nel que se precisen estudios y propuestes feches con rigor pa tratar de solucionar los nuevos problemes que se nos presenten a les muyeres trabayadores.

    Quiciabes tengamos que pensar nuna reorganización del mundu llaboral: trabayos dignos a tiempu parcial, trabayu compartíu, teletrabayu, xornaes compatibles cola crianza de los fíos, coincidencia d'horarios llaborales y escolares, ente otros. La situación ye difícil y ye un retu, porque lo que ta claro que munches muyeres queremos ser independientes económicamente, ensin abandonar la gran misión que la Naturaleza nos encamentó que ye la de ser madres, respetando la decisión de cada cuál de traer o nun traer fíos al mundu. La sobrecarga a la que se somete la muyer que tien fíos y trabaya amás fuera de casa ye bien sabida a poco que reflexonemos. Na sociedá occidental tamos quedando ensin neños, solo fai falta echar una güeyada a les estadístiques y ver los índices de natalidá, el númberu de fíos por pareya, la edá de les madres primerices, pa danos cuenta de que dalgo nun funciona bien.

    Los homes, como clase dominante, nun tuvieron en munchos aspeutos al altor de les circunstancies; nun pueden tar arguyosos del desempeñu del poder; falta d'equidá, intolerancia, violencia, inxusticies, inseguridá, guerres, caos, y otres perversiones, sumen a la nuesa sociedá nel desconsuelu. Quiciabes tamos ante l'empiezu d'una era onde les muyeres tengamos que tomar el relevu y podamos, cola preparación, intuición, sentíu común y otros dones que nos carautericen, camudar el mundu. Creo que nun hai marcha atrás, la muyer ta demostrando la so valía en toles estayes sociales, pero precisamos tener accesu n'igualdá de derechos al mundu del trabayu, a cargos direutivos, a la investigación y al poder. Nesti sentíu, gústame terminar esti artículu parafrasiando a Flora Tristán, lluchadora socialista, quien na so obra Unión obrera, caltenía que "toles desgracies del mundu vienen del olvidu y despreciu qu'hasta güei se fixo de los derechos naturales de ser muyer qu'enxamás prescriben".

     

    Compartir en Twitter
    Compartir en Facebook