Dicen que l'arte imita a la vida, pero a veces ye la vida la que calca l'arte. Lo que ye la poética surrealista. Tábemos col proyeutu AVRVM 27 artistes incordiando pela auriferia del Paraísu, cuando topamos la melguera noticia de les abeyes del FAPAS trabayando en planta p'Asturgold.
La propuesta interesa al arte porque trai la Bomba de miel nel llugar de trabayu (Honigpumpe am Arbeistplatz) del artista alemán Joseph Beuys, que vien col semeyu renováu pal aviesperu de Tapia.
Joseph Beuys, Honigpumpe am Arbeitsplatz, 1977, téunica mista, midíes variables.
Na Documenta de Kassel de 1977 la bomba de miel yera una máquina que xeneraba un movimientu continuu ente'l mundiu del arte y el mundiu les idegues, como plantes d'una mesma fábrica. Una bomba facía furrular una exa y el miel diba pelos tubos que percorríen tres pisos, travesando los espacios de la revolucionaria Universidá Llibre Internacional pa la Creatividá y la Investigación Interdisciplinar de Beuys. La maquinaria tresfería enerxíes ente lo vexetal, lo animal y lo humano. L'abeya, símbolu del trabayu y cadarma social, llaboraba'l productu artísticu: el miel de la creación. L'inventu mieleru xunía los vasos comunicantes, apurría la función del arte al alderique social y la pieza artística algamaba asina la utilidá pública.
L'arte ye un procesu en movimientu, una fuercia de choque nun mundiu en tresformación, que dicía Picasso. Los truébanos tienen d'incorporase agora al proyeutu en marcha. Un conceutu ampliao d'arte asitiaría'l discursu artísticu del AVRVM nel espaciu abiertu pola apicultura de los metales.
La nueva bomba de miel ye una pieza espeutacular. Son los primeros pasos pa un muséu de la ciencia Asturgold. Namás cola instalación del setón ente los pinos, les abeyes faen que la esplotación seya sostenible, biotéunica, ensin gota cianuru, mercuriu o plombu incontrolaos... Les obreres del metal, nel so poéticu abeyar de flor en flor, miden los niveles de contaminación. Abasten soles pa que'l tarrén onde la multinacional quier abrir la mina d'oru salve toles desixencies medioambientales.
Ún, que ye d'artes y lletres, pensaba na so inorancia que los controles biolóxicos facíense cola mina furrulando, pero non, ye abondo con montar l'altarín a Silvano nos Lagos de Silva y pañar el rico miel, los datos de los floriatos son que'l suelu nun ta contaminao. Nun fai falta esperar a que la mina eche llamuerga a la balsa, les industrioses abeyes tienen la presciencia. Los medios de comunicación esparden el polen de la ciencia, y hai que tragalo. Al que plasme y abra la boca, una cucharadina de miel de Salave.
La fábula de les abeyes ye la clave. Verdá ye que'l FAPAS nun fai más que llantar la postal, facer midiciones, parámetros, bioindicadores pa testar la cosa: (re)presentar un grau 0 de contaminación. El llugar de partida pa una estratexa de llexitimación na declaración d'impautu ambiental gana unos cuantos enteros. Esi ye'l territoriu onde rinden los panales.
Hai que felicitar a don Roberto Hartasánchez, l'apicultor de la empresa, pola idega. Dengún artista land art sabría facer meyor intervención nel paisaxe, nin más rentable. Por namás 300 ourales pa la producción de la pieza.
Ovidio, el poeta llatinu, col ensame de les Metamorfosis daba llición moral al serviciu del Augustu. Cunde l'abeyeru a la pax romana de la mina astur de la dómina, como nesti mes d'agostu la performance de les abeyes a la paz tapiega.
