El senderu d'apenes dos kilómetros que lleva de Gúa a Caunéu, nel parque nacional de Somiedu, vuelve convertise nel tramu nel que reinen los osos. La conseyería de Medio Rural del Principáu resolvió va díes acutar de forma temporal l'accesu y tránsitu de turistes na ruta entre Gúa y Caunéu nos meses d'agostu y setiembre. Yá tán mangaes les señales informatives cola restricción, de la que tán escusaos propietarios, renteros de finques, vecinos y ganaderos, mesmo los servicios municipales, fuerces de seguridá o personal de vixilancia y xestión del Parque. Ye una zona rica n'ablanares y escuernacabres, con frutos que maurecen nestos meses y que son alimentu habitual de los osos, polo que la so presencia na zona ye habitual. 

Dende va dellos años, la Guardería del Mediu Rural toma midíes nesta zona pa evitar que los osos sufran molesties de visitantes o que se produzan situaciones de peligru pol alcuentru ente persones y estos animales. Sicasí, los responsables del parque natural nun pretenden que los turistes pierdan la oportunidá de contemplar osos, en condiciones de seguridá. Asina, según recalcaron fontes municipales de Somiedu, quieren mangase miradores y zones d'estacionamientu en Gúa y Caunéu dende les que poder disfrutar de la fauna selvaxe de forma curioso. 

La resolución del Principáu pola que se llinda l'accesu de turistes al senderu recalca que “nos últimos años viose medrar notablemente'l avistamientu d'osos a dambes marxes del ríu”. Y por cuenta d'esta mayor presencia de los osos “tamién aumentó'l númberu de persones qu'aporten a la zona pa facer avistamientos, colocándose munches vegaes nel camín”. 

La recuperación del osu convirtióse nun pervalible recursu turísticu p'aquelles zones nes qu'habita la especie. Un estudiu recién publicáu pola Fundación Oso Pardo y ellaboráu pola Universidá d'Uviéu y la Unidá Mista d'Investigación en Biodiversidá de Mieres aseguraba que la especie xenera al añu nos conceyos del Cordal 20,5 millones d'euros y contribuyó a crear o sostener 350 empleos. Casi la metá de los 200 negocios evaluaos en 2019 pa esi informe taben llantaos n'Asturies. 

Pero la creciente presencia de turistes que quieren contemplar osos en llibertá tamién obligó a aumentar los precuros en ciertes dómines. “Hai imaxes como les de coches aparando nes carreteres y persones corriendo pa ver d'averase a un osu que nun correspuenden col modelu turísticu y de caltenimientu que queremos afitar”, aseguraben fontes municipales de Somiedu, que defenden la necesidá d'establecer zones clares dende les que poder disfrutar de la observación d'osos, pero ensin causar interferencies. Anque los alcontrones ente osos y persones son escasos, esti mesmu añu una muyer de 75 años sufrió mancaures graves en Cangas n'atopando con un osu que la atacó cuando pasiaba al escurecer per una carretera comarcal de Sonande.