A lo llargo de tola so vida, la variante de Payares siempre tuvo presente: n'obres, somorguiada nel alderique políticu. Cinco estudiantes del IES Doctor Fleming d'Uviéu, de 17 años, nacieron de la qu'entamaben los trabayos nuna fazaña d'inxeniería que pon fin al aislamientu ferroviariu d'Asturies. Cuando faigan el so primer viaxe n'alta velocidá a Madrid van tener yá la mayoría d'edá. 

Álvaro García, Irene Bernaldo de Quirós, Tamara Fernández, Mavisa Colino y Daniela Suárez creen que meyores conexones cola Meseta van traducíse en “más llibertá”, anque visto que l'asuntu los tien acompañao tola so vida perdieron un poco la referencia. Inclusive dalgún almitió que nun sabía de la esistencia de la Variante “hasta güei”.

Optimistes al respective del futuru, tán dispuestos a comese'l mundu. Tamara Fernández, futura estudiante de Psicoloxía –“o Maxisteriu, entá nun lo tengo claro”– reconoz que la nueva conexón ferroviaria va ayudar a conectar meyor Asturies col restu del país. “Va venir bien pa encurtiar los tiempos y pa poder movete. Amás, creo que va aumentar el númberu de viaxeros si funciona correchamente, y eso ye bono”, asegura. 

Sofitando les sos palabres ta Suárez, una moza estudiante del Bachilleratu Biosanitariu con mires d'entrar nel grau d'Enfermería “pa curiar a la xente”. “Esto –la Variante–, ta perbién pa poder viaxar con más llibertá. Por casu, si quies dir una fin de selmana pa pasalo cola familia o amigos, pue ser muncho más rápido tou, van acelerase los trámites”, señala. 

Mavisa Colino comparte deséu d'estudiar Enfermería y “encantaría-y ser” matrona. “Pero estudiar n'Uviéu, claro”, añede. Abultó-y "xenial" la noticia qu'acompañó esti día'l café a miles d'asturianos. “La xente va viaxar muncho más, porque si ye más barato y más amañoso, va venir xenial, sobremanera pal turismu. Anque tamién depende de cómo funcione, porque si a la fin nun tien beneficios ye perder tiempu y dineru”, recalca.

Asina foi'l pasu del primer tren pelos túneles de la Variante de Payares

Rentable o non, Álvaro García piensa utilizalo enforma. “Viaxé delles vegaes en tren, pero desconocía les obres. Estos viaxes yeren bien aburribles, porque desque sales de Llión ye too muncho más rápido. Pero d'ellí a Asturies, ye una aburrición. Ente que tienes que dir de llombu y que se da la vuelta'l tren, pierdes muncho tiempu. Agora ta perbién pa poder viaxar con más llibertá”, asegura. Álvaro García pretende nun futuru vivir fora d'Asturies, polo qu'asegura que la futura conexón vien-y que “ nin pintada”; pero va volver, “nunos años, cuando sía mayor y quiera tar nun sitiu fixu”, indica. 

Irene Bernaldo de Quirós tien duldes sobre'l preciu del trayectu: “Depende de lo que cueste pue salite más baratu qu'un viaxe en coche, y asina, amás del peaxe, aforres en gasolina. Aparte vien xenial tamién pal tresporte de mercancíes. Si te fai falta que daqué llegue rápido dende un sitiu a otru esto ye perfecto”, amestó quien suaña estudiar Física y Matemátiques, mesmo qu'Álvaro García.

Los cinco estudiantes tienen daqué de mancomún: nun cuenten estudiar fora de casa. “Ye más barato facelo n'Uviéu, polo que nun tenemos pensao movenos a otros sitios. Pero nel casu de que nun futuru tuviéramos que marchar, por casu a Madrid, l'alta velocidá va tar xenial pa poder venir a casa más de cutiu, y, sobremanera, dir y volver nel día, non como agora, qu'hai que facer nueche ellí”, asegura García. 

El futuru esmolezlos, pero tán preparaos pa comese'l mundu. “Nun creo que siendo enfermera haya problema p'atopar trabayu, y más agora cola tema del coronavirus. N'otros oficios pue que haya daqué más de dificultá”, esplica Colino. Esa dificultá afecta más a los científicos, según García. “Con estes carreres puede trabayase en bancos, con Big Data, investigando... Pero nun ta decidíu. Taría bien investigar sobre física cuántica, por exemplu”, conclúi. 

Lo que ta claro ye que les nueves xeneraciones, les de la conexón permanente per internet, tamién van tar meyor conectaes físicamente col restu del país, y eso dexará-yos tener más oportunidaes. “Ye una gran meyora pa toos, cuantimás pa los mozos asturianos”, comentaron los cinco.