Galicia, País Vascu, Andalucía... Delles comunidaes qu'apostaben por ser el trubiecu del balonmano n'España ríndense agora a la evidencia. El balonmano o “handball” partió de les cuenques mineres, más concretamente de Llaviana. Y fíxolo de la mano de dos destacaes muyeres, Purina Zapico y Luisa Álvarez. Ésta última finó'l pasáu día 3 de xineru, a los 98 años d'edá.
La investigación sobre l'orixe del balonmano n'España vien de la mano de Luis de Dios Ruesga, ex-xugador de balonmano y padre de Carlos Ruesga, xugador internacional qu'anguaño milita nel Sporting de Lisboa. “Llevo munchos años con esta investigación, que realicé con muncho ciñu y rigor. Yá dende va años defendíase que l'orixe del balonmano ta en Llaviana, pero ye que tol mundu quería axudicá-ylo. Tres la muerte de Luisa Álvarez, nun pudieron negar la evidencia”.
Luisa Álvarez foi la primer xugadora d'España cola llicencia oficial. Pero non solo eso, el primer equipu oficial que s'inscribió foi'l de La Pola Llaviana y la primer competición oficial foi'l Campeonatu d'Asturies de balonmano.
Pero, ¿cómo aporta esti deporte a Asturies? Pues cuenta Ruesga en “Origen oficial del balonmano en España” que l'asturiana Purina Zapico foi la qu'introdució la práctica del balonmano ente la población civil española. Zapico tuviera n'Alemaña, onde aprendió la técnica, la esperiencia organizativa y el reglamentu de les dos modalidaes del deporte, y na primavera de 1938 tráxolu a la so localidá natal. Asina que se formen los primeros equipos y celébrense les primeres competiciones siendo les muyeres, como asocedió n'Alemaña, les primeres en practicalo. Amás, tuvo perbona aceptación, mesmo de participantes que de públicu. “Yera un deporte mui dinámicu, gustaba muncho”, cuenta Ruesga, señalando que “podíen tener más de 2.000 persones de públicu, cosa qu'agora yá nun se ve”.
Y llegaron les primeres competiciones oficiales, el Campeonatu d'Asturies, que se realizó na temporada 1939-1940 en campu y en 1943-1944 en sala. Equí, l'equipu pioneru de La Pola Llaviana llogró'l primer títulu de campeón d'Asturies nes dos modalidaes. Y darréu, tamién llograron el títulu de campeón d'España, mesmo en campu qu'en sala.
La capitana del equipu llavianés yera Luisa Álvarez, que xugó a lo llargo de ventitrés años, siendo considerada una de les meyores xugadores españoles. Álvarez yera toa una lleenda ente los sos vecinos y asina lo atestigua una anécdota que cuenta Ruesga cuando'l so fíu-y díxo que quería conocela. “Fuimos a Llaviana y tuvimos nun par de sitios. Nún d'ellos, cuando entró Luisa, tol mundu allorió con ella; paecía que taba entrando Cristiano Ronaldo, y el mio fíu quedó ablucáu”, señala.
A Madrid
De Llaviana a Madrid, y, d'ehí, al restu del país. Daes les bones relaciones que caltenía Purina Zapico con estudiantes de la capital, consiguió en 1940 que'l trabayu realizáu poles muyeres asturianes tuviera continuidá en Madrid. La universidá madrilana espárdelu rápido pel restu del territoriu nacional convirtiéndose en pocos años nel tercer deporte d'equipu d'España.
La investigación de Juan de Dios Ruesga foi llarga. Empezó en 1978 cuando realizaba'l tercer cursu d'Educación Física na Universidá Politécnica de Madrid. Dos profesores, Domingo Bárcenas y Juan de Dios Román coménten-y que, siendo asturianu, interesaría-y saber que, según afirmaben dellos profesores de la universidá, fueren les muyeres asturianes les primeres en practicar el balonmano oficial n'España. Ruesga quería comprobar si esos comentarios yeren ciertos pa incluyilos nun trabayu sobre la hestoria del deporte n'España, asina que se punxo a investigar. Entrevistóse colos profesores y otres muyeres que xugaren balonmano ente 1940 y 1960 y empezó a afayar qu'eso que-y contaren yera cierto. Más tarde contactaría con Purina Zapico y cola mesma Luisa Álvarez, “la madre del balonmano”.
