La presencia de la muyer nel mundu de la sidra, tradicionalmente centrada nos llabores de recoyida de la mazana o la llavadura y l'enllenáu de les botelles, algama güei tolos ámbitos. Hai llagareres al mandu de dalgunes de les marques más emblemátiques de la rexón, enólogues, campeones d'escanciáu y propietaries de sidreríes de postín. Les pioneres navetes de toes estes muyeres que protagonicen l'esitosu relevu xeneracional del sector son les vilbes de llagareros que nos años trenta y cuarenta del sieglu pasáu decidieron ponese al mandu del negociu familiar a la muerte de los sos maríos. Dalgunes de les marques que crearon entós sobrevivieron al pasu del tiempu y siguen nel mercáu. El casu más emblemáticu ye'l de Sidra Viuda de Corsino, el llagar más antiguu de tolos que siguen n'activu na villa naveta. Tamién puede citase el de Viuda de Angelón, anque nesti casu nun se trate d'una llagarera sinón d'una reconocida hostelera. Sidra Viuda de Alfredo dexó d'ellaborar va munches décades, pero tamién supunxo un notable exemplu d'emburrie empresarial femenín amestáu a la sidra nun momentu que poco o nada tenía que ver col actual.
La vilba de Corsino que da nome a la sidra que se sigue ellaborando na cai la Riega de Nava foi Elisa Díaz, madre de Víctor y Corsino García, dos grandes llagareros tamién finaos. Taba casada con Corsino García cuando, na década de los años venti del pasáu sieglu, el matrimoniu heredó'l llagar navetu que fundara'l so suegru, Bonifacio García, alredor de 1875. A la muerte del home, foi ella la que garró'l ramal, entamando la comercialización baxo la marca Sidra Viuda de Corsino. El negociu pasaría a los sos fíos a finales de los años cuarenta y, depués, nos noventa, el pesu del llagar yá diba posase cada vez más sobre Andrés Corsino García, cuarta xeneración fabricantes de la saga y nietu de Elisa. Tres una crisis económica, l'establecimientu adquiriólu nel cambiu de sieglu Luis Fernando Morán, el so actual propietariu.
Otra de les pioneres del sector en Nava foi María Luisa de la Vega, finada en 2002 a los 101 años d'edá, siendo la decana de la sidra local. Esta muyer, madre del tamién desaparecíu Leonardo Pérez, ún de los grandes maestros navetos del llagar, quedó vilba d'Alfredo Pérez, que comercializaba'l productu qu'ellaboraba en La Barraca como Sidra Alfredo. María Luisa decidió siguir alantre col negociu tres la Guerra Civil, corchando como Sidra Viuda de Alfredo. La tradición siguióla'l so fíu Leonardo, más conocíu en Nava como Leo, quien compartió col so cuñáu José María Caso, el gran impulsor del Festival de la Sidra, la propiedá de Sidra Peñamayor, sumida tamién va décades. Tanto'l fíu de María Luisa de la Vega como Corsino García, ún de los fíos d'Elisa Díaz, ostenten el títulu de llagareros insignes de Nava.
Otra vilba da nome a una de les sidres más reputaes de Nava y Asturies, la d'Angelón. Trátase de Carmen Onís, madre d'Alfredo Ordóñez, fundador en 1947 d'un llagar nes finques de l'Alameda. Escoyó Sidra Viuda de Angelón pa xunir l'alcordanza del so padre col homenaxe a la so madre, que rexentaba una sidrería bien conocida. Alfredo finó en 1999, col llagar yá en La Teyera. El relevu garráronlu los cinco fíos que tuvo con Amelia Vigil (Alfredo, Ángel, Fran, Carmen y Susana), que fixeron un esitosu procesu d'espansión y diversificación de la marca.
