La vulnerabilidá énte los depredadores, al nun permanecer les aves lliberaes nun área reducida, son una de les torgues principales coles qu'atoparon los responsables del centru de cría del faisán montés a la de facer sueltes de la especie nel mediu natural. Asina lo señaló'l conseyeru de Mediu Rural y Cohesión Territorial, Alejandro Calvo, en respuesta al diputáu de Ciudadanos Sergio García sobre les midíes que se ta tomando dende'l Principáu pa la protección d'estes aves. 

“Un problema pa la lliberación ye la falta d'afitamientu a un espaciu, faciendo continuos desplazamientos que faciliten la so predación”, espón el conseyeru. Eso sí, señala qu'esisten “esperiencies actuales nel manexu que permiten ameyorar estos aspeutos y ameyorar les posibilidaes de supervivencia”. 

Sía comoquier, el Principáu, tres los intentos realizaos cuando s'entamó la instalación, nun ta evaluando pel momentu la lliberación de más aves, yá que “entá nun se consiguió producción d'individuos abondo pa la so lliberación nel mediu natural”. Solo 16 de les 102 aves que nacieron nel centru de cría del faisán, allugáu nel parque de Redes, llograron sobrevivir. Les 102 nacencies calcúlense del balance d'actividá que'l Conseyeru fai del centru del urogallu na última década. Nesti tiempu “realizáronse 382 analises parasitolóxicos, 293 microbiolóxicos, histolóxicos y toxicolóxicos siempre que se consideró que facía falta”. Amás, “realizáronse 160 embriodiagnosis de los güevos y 86 necropsies de tolos pitos y adultos muertos nel centru”. 

Un aspeutu destacáu pol Conseyeru ye la “elevada importancia” que tien esta espacie n'Asturies. Ello ye que los gastos non ordinarios rellacionaos col caltenimientu de la espacie algamaron los 590.000 euros nos últimos diez años. Eso ensin contar los gastos de caltenimientu del propiu centru, indicó. 

Incubación

Nes instalaciones allugaes nel parque de Redes consíguese “una incubación media añal d'una ventena de güevos, con una tasa de supervivencia mui curtia por cuenta de les patoloxíes que s'alcuentren n'estudiu” y que permiten llevar l'analís de “esta problemática a les poblaciones monteses, lo que podría ser ún de los factores del so descensu poblacional”. Nesa llinia, Calvo aludió a les muestres que se fixeron “pa estudios xenéticos y d'estrés, que dexaron establecer patrones hematolóxicos y bioquímicos del faisán cantábricu, l'estudiu d'enfermedaes infeicioses y parasitaries –que nun sería posible estudiar nel mediu natural– y l'establecimientu d'un bancu de xermoplasma”. 

Según el Conseyeru, los estudios realizaos “permiten afirmar que les diferencies físiques, como'l llargor d'intestinos, el tamañu del corazón o'l desenvolvimientu muscular, ente otros, nun constitúin un problema pa la so adaptación a la vida montesa”.