La esperiencia de dormir nel teitu más grande de La Pornacal

El Conceyu de Somiedu, dientro del so plan de sostenibilidá turística, acaba d'adquirir una de les cabanes de teitu más grandes de La Pornacal. L'oxetivu nun ye convertila n'agospiamientu turísticu al usu, sinón que les empreses locales del sector puedan ufiertar a los sos veceros la esperiencia de pasar una nueche ente los sos murios como facíen cuantayá los ganaderos. Ye una de les nueves iniciatives turístiques que'l conceyu desveló na feria Fitur. 

"Pescúdase asina una solución alternativa al usu actual de los teitos que permite caltener el nuesu patrimoniu etnográficu", señalen dende'l consistoriu. Amás, dientro del impulsu al denomináu "turismu esperiencial", Somiedu esplica que ta participando nel productu estatal "Esperiencies d'observación de fauna" que lidera la Secretaría d'Estáu de Turismu. La idea, faen, ye asitiar a España como referente nel avistamientu de fauna y "Somiedu apurre al paquete'l nuesu emblema, l'osu pardu". 

Ente les nueves propuestes desvelaes na feria madrilana ta tamién la señalización d'un total d'once percorríos cicloturistes: cuatro puertos míticos de La Vuelta a España y siete "murios desconocíos pal gran públicu, de curtiu percorríu y gran pendiente y dificultá".