Cuasi ocho de cada diez asturianos esmuélense por reciclar los sos residuos

Cuasi'l 80% de los asturianos esmuélense por xestionar bien los sos residuos, según un estudiu encargáu por Cogersa p'analizar el grau de conocencia y los vezos que la ciudadanía manifiesta tener en relación cola xestión de los residuos y la economía circular. Ente los resultaos, rescampla una esmolición alta (perriba del 80%) pol reciclaxe y correcta xestión de los residuos, la demanda de más información sobre'l procesu (un 70,4%) y la implicación diaria con vezos de separación de papel, envases y vidriu (un 88% de los encuestaos) y de los tóxicos y avolumaos que van a los puntos llimpios (un 67%). El vicepresidente del Consorciu pa la Xestión de Residuos Sólidos d'Asturies (Cogersa), Pablo Álvarez, director xeneral de Calidá Ambiental del Gobiernu del Principáu; y la xerente de la entidá supramunicipal, Paz Orviz, presentaron va unos díes les conclusiones d'esti estudiu demoscópicu realizáu pola firma Sygma Dos. 

Fexéronse 1.108 entrevistes telefóniques ente'l 11 de setiembre y el 9 d'ochobre de 2023. La muestra distribuyóse de forma representativa per tol territoriu, estableciéndose un repartu per ocho demarcaciones (Uviéu, Xixón, Avilés, Nalón, Caudal, Oriente, Narcea y Eo-Navia) y, dientro de les trés principales, per otros trés estratos correspondientes a los conceyos de Xixón, Uviéu y Avilés. El 56,9% de los encuestaos ye del xéneru femenín.