Récord d'hoteles en venta n'Asturies poles rabotaes del covid: los más emblemáticos y lo que piden por ellos
Mediu centenar d'establecimientos busquen comprador
La devolución de creitos de la pandemia, el "acabose" pa munchos negocios
Un hotel en venta en Noreña. / F. Torre
El coronavirus entá sigui frayando al sector hoteleru d'Asturies. Nin les ayudes públiques pela pandemia nin la escelente temporada turística del añu pasáu fueron quien a caltrizar toles feríes y munchos negocios quedaron pel camín. "La devolución de los creitos del covid foi l'acabose pa munchos", apunten fontes del sector hoteleru. De resultes d'ello, n'Asturies rexistrase nestos momentos un récord d'hoteles que tienen colgáu'l cartelu de "viéndese"
El portal inmobiliariu Idealista realiza dacuando informes sobre establecimientos con llicencia hotelera que s'alcuentren a la venta. Son estudios que tomen como base los anuncios que se publiquen nel portal web. Ello ye que nun son datos oficiales nin cubren tola ufierta, pero son un mididor fiel de la temperatura del mercáu porque la mayoría de los establecimientos en venta utilicen esti escaparate dixital. Según la base de datos d'Idealista, en febreru anunciábense 47 inmuebles con llicencia hotelera n'Asturies que buscaben comprador. Son trés más que va un añu (44) y al mesmu nivel que n'agostu de 2023, cuando n'España se rexistró'l máximu. "La ufierta d'inmuebles en venta con estes característiques nun aparó de crecer dende l'españíu de la pandemia del coronavirus en marzu de 2020, y algamó'l so picu'l branu pasáu", señalaron fontes d'Idealista.
Namás provincies mui turístiques con un ampliu parque hoteleru tienen más inmuebles en venta qu'Asturies. Son Baleares (84), Málaga (78), Girona (75), Alacant (71), Granada (62), Valencia (51) y Barcelona (48).
Dientro de la relación d'hoteles en venta n'Asturies, hai establecimientos nos conceyos de Llanes, Ribeseya, Casu, Siero, Grau, Tapia, Samartín del Rei Aurelio, El Valle Altu de Peñamellera, Peñamellera Baxa, Noreña, Cuaña, Ayer, Parres, Salas, Cuideiru, Tinéu, Mieres, Navia, Piloña y L.lena.
La tipoloxía d'establecimientos ye mui variado, dende pensiones y hostales hasta hoteles de cuatro estrelles, como ye'l casu del hotel Indiana de San Roque del Acebal (Llanes), pol que piden 1.600.000 euros. Nun ye'l preciu más altu n'Asturies. Pol hotel Palper, un establecimientu de trés estrelles emblemáticu de Grau, piden 2.300.000 euros, y pol complexu de turismu rural La Quintana de Villar, en Parres, 2.100.000 euros. Na ufierta tamién hai hoteles que pertenecieron al sellu calidable Casones Asturianes, como ye'l casu del hotel Casona de D´Alevia, en Peñamellera Baxa, o l'hotel L´Aldea Perdida, en Prieres (Casu ) ún de los pioneros del turismu nel parque natural de Redes.
- Demoledor escrito de la Comisión Europea: asegura que la prórroga del peaje del Huerna fue ilegal
- Así será el calendario escolar 2024-2025 en Asturias: mismo día de inicio para todos y tres descansos pedagógicos
- Si eres un amante del buen comer, La Chalana te trae algo que te interesa
- Otro hito para la llegada de los Avril: el primer AVE con pasajeros completa un trayecto Madrid-Asturias en el que "se va muy bien
- Las reacciones en Asturias al anuncio de Pedro Sánchez: del "no todo vale" de Barbón, al "victimismo" de Queipo
- El mejor supermercado": el curioso tatuaje que se ha hecho una persona sobre una conocida marca asturiana
- El Principado se compromete a "seguir trabajando para eliminar el peaje" del Huerna y el PP dice que la prórroga "estaba dentro de la legalidad
- El peaje del Huerna se prorrogó para obtener más dinero: LA NUEVA ESPAÑA desgrana el dictamen de la UE que pone en entredicho la tasa de la autovía
