El semilleru de Valnalón dispara la so actividá: esta ye la cifra d'empreses qu'ayudó a crear la entidá l'añu pasáu

L'actividá del semilleru d'empreses de Valnalón disparóse l'añu pasáu por aciu del ésitu de proyectos como el “Banco de Ensayos para Emprender”, un programa destináu al desenvolvimientu de modelos de negociu que puedan ser vidables y rentables. Frutu del llabor que realiza la entidá, a lo llargo de 2023 fueron un total de 41 les empreses que se materializaron col asesoramientu y guía de Valnalón. “Trabayóse con una gran intensidá y ye importante rescamplar la tasa de torna que xeneren les nueves firmes, yá que por cada euru públicu invertíu, retornen 9,37, especialmente al traviés de tases ya impuestos”, destaca Ignacio Iglesias Vázquez, director xeneral d'Empreses, Pymes y Entamadores del Principáu d'Asturies.

El conseyu d'alministración de Valnalón fixo balance de l'actividá desenvuelta l'añu pasáu pola entidá. “L'oxetu de Valnalón fai tanta falta agora como cuando se creó 1987 y ye que pa crear un territoriu entamador sostenible, anovador y comprometíu, tien d'empezase a fomentar competencies entamadores, como trabayar n'equipu, asumir decisiones y riesgos, comunica o anovar”, destacó Ignacio Iglesias, presidente del órganu. 

Les 41 empreses que Valnalón ayudó a crear en 2023 suponen un 78 por cientu de crecimientu al respeutive de 2022, exerciciu en que'l recuentu foi de 22 proyectos. Ignacio Iglesias esplicó qu'esti importante repique débese a cambios d'estratexa, reforzando l'apuesta pol nuevu emprendimientu, “mentanto que va dos años dióse-y especial atención al afitamientu d'actividaes yá en funcionamientu”. Tamién valoró l'ésitu de programes como'l citáu “Banco de Ensayos para Emprender”. Trátase d'una iniciativa desarrollada por Valnalón pal Centru d'Orientación, Emprendimientu, Acompañamientu y Anovación pal Empléu Asturies (COE). 

Cobertoria asturiana

De les nueves empreses que s'entamaron gracies al asesoramientu y sofitu de Valnalón, el 20 por cientu asitiaron na mesma cuenca del Nalón. “Qu'el 80 por cientu de les firmes tengan la so localización n'otros territorios asturianos demuestra la proyección autonómica de la entidá”, indica Ignacio Iglesias.