Asina tien camudao'l cartel de la Selmana Santa d'Avilés nos postreros 70 años

Setenta y un años dixebren el primer cartelu anunciador que se conserva de la Selmana Santa d'Avilés –fecháu en 1953– y el qu'esti añu firma l'artista Samuel Armas. Siete décades nes que los cofrades usaron grabaos, fotografíes, dibuxos y pintures pa ilustrar un póster que cumple tolos años dellos oxetivos: anunciar la proximidá de la Selmana Santa, llindar les feches ente les que se van celebrar les procesiones, xenerar espectación y sopelexar dalguna de les estampes ya imaxes característiques del tiempu penitencial nuna ciudá rica en patrimoniu relixosu.

Indirectamente, estos cartelos que se sucedieron nel tiempu formaron un catálogu artísticu de primer orde y la so contemplación dexa apreciar cómo evolucionaron los gustos estéticos y los recursos técnicos d'impresión. Podría dicise que con ayuda d'estos cartelos constrúyese, como si fueren fotogrames, la película de la etapa moderna de la Selmana Santa d'Avilés. Ye por eso, pol valor históricu qu'atesoren, que la Xunta de Confreríes d'Avilés entamó la escoyeta de toa esta cartelería antigua y enséñala dende va unes selmes na páxina web creada a costa fecha pa la Selmana Santa d'Avilés, ún de los requisitos que tienen que se cumplir pa optar a l'allampada declaración de Fiesta d'Interés Turísticu Nacional.

"Pero nun tán tolos cartelos entá", almite'l presidente de la Xunta de Cofradíes, Carlos Fernández Mora, quien de siguío espresa'l so enfotu en rellenar los buecos agora vacíos. "Pidimos a cualesquier que tenga dalgún de los cartelos antiguos que falten na colección amosada na web a apurrínoslu p'axuntalu", solicita. Concretamente, falten munchos de los editaos ente 1956 y 1982.

El primer cartel, el de 1953, da fe de la esistencia de namás cuatro entidaes de les ocho qu'anguaño componen la Xunta de Cofradíes; yeren el Santu Entierru, San Xuan Evanxelista, Nuestra Señora de los Dolores y Nuestru Padre Xesús de Galiana, precisamente la hermandá que'l so pasu –el del Nazarenu cargáu cola Cruz– más vegaes protagonizó'l cartelu de la Selmana Santa, cuandu menos de los que s'amuesen na colección visitable na web corporativa.

Ye costume que les ocho cofradíes esistentes na actualidá roten en ciclu protagonizando los cartelos, magar hai años escepcionales en qu'esta dinámica rompióse: asocedió en 2021, añu del covid, cuando la semeya escoyida foi l'atriu vacíu de la ilesia de San Nicolás; en 2003 y 2023, años nos que'l cartel dedicóse al conxuntu de les cofradíes o esti mesmu, pos el cartelu portagonízalu la hermandá del Besu de Xudas cuando l'honor tuviera de corresponde-y al Santu Entierru, que solicitó correr la vez pa facer coincidir el derechu a ser portada de la Selmana Santa col añu en que va conmemorar el so 75º aniversariu. Otru interés: l'artista que más cartelos ilustró ye Favila, que puede ser oficiosamente etiquetáu como'l pintor de cámara de la Selmana Santa d'Avilés.