Cultura empieza la declaración de Lucus Asturum como Bien d'Interés Cultural

Va tiempu que taba anunciáu, pero finalmente la Conseyería de Cultura dio en incoar l'espediente pa la declaración como Bien d'Interés Cultural, con categoría de Zona Arqueolóxica, del yacimientu identificáu como Lucus Asturum, que ta allugáu nel conceyu llanerense, a menos d'un kilómetru de Llugo. 

Los restos que nos últimos años se fueron alcontrando en dichu yacimientu «constitúin un significativu testimoniu de la ocupación del área central de l'actual Asturies nes dómines romana y medieval», rescamplen nel espediente, qu'esti día se publicó nel BOPA. Según los espertos, ye de destacar, «la importancia del enclave, consideráu un "vicus viarii" (montonera de tipu secundariu y configuración espardía), cuandu menos a lo llargo de la segunda y tercer centuria dempués de Cristu».