El negociu industrial crez n'Asturies dempués d'un añu de cayida
Les empreses desfaense de "stocks", lo qu'esplica l'aumentu de la facturación cuando entá reculen producción y precios
El negociu industrial crez n'Asturies dempués d'un añu de cayida / LNE
La cifra de negociu de la industria asturiana volvió a la sienda positiva con un crecimientu interañal del 0,5% en xineru depués d'un añu de descensu consecutivu. Con too y con ello, la meyora foi inferior a un terciu del promediu nacional (1,6%). De les 17 comunidaes autónomes, seis siguieron en retrocesu, y delles con un perfil industrial acusáu, casu de País Vascu, según espublizó esti día l'Institutu Nacional d'Estadística (INE).
La meyora de la facturación industrial interañal en xineru –lo que nun asocedía dende marzu de 2023– producióse magar que va dos meses la producción en volume tovía cayó'l 1,1% y cuando los precios industriales tamién recularon, con un descensu del 6%, según sopelexó l'INE va unes selmanes.
La paradoxa aparente de que creza'l volume de negociu cuando recula tanto la producción como'l preciu apunta a que les empreses tán recurriendo a amenorgar "stocks", lo qu'esplicaría que l'alza de la demanda y de les ventes nun repercutiera entá nuna medría paralela de la fabricación.
El postreru indicador de clima industrial de la Sociedá Asturiana d'Estudios Económicos ya Industriales (Sadei), espublizáu'l pasáu día 11, apunta nesta dirección. El 35% de les empreses industriales asturianes consultaes en xineru antemanaron la previsión d'amenorgar los sos "stocks" de productos acabaos mentanto que'l 65% daben por fecho que los caltendríen. De la mesma, el 100% contaben caltener la cartera de pidíos y el 99% antemanaba una producción estable.
Asturies ye la única comunidá del Cantábricu na que la facturación creció en tasa interañal en xineru. País Vascu, Galicia y Cantabria rescamplen entá tases negatives, mesmo que La Rioxa, Castiella-La Mancha y Comunidad Valenciana.
La tasa interañal asitia a Asturies como la undécima rexón pola medría de los ingresos de la industria en xineru en variación añal. De les que tuvieron enclín positivu ye na que menos creció. En variación mensual (al respeutive d'avientu), la cifra de negociu asturiana creció'l 8,5%, más que la media (5%). Foi la séptima rexón con una variación más bultable.
El negociu industrial asturianu tuvo un crecimientu intensu –d'hasta'l 59% dalgún mes– en 2021 y 2022, y entró en retrocesu en 2023, en parte pol efectu base.
- Demoledor escrito de la Comisión Europea: asegura que la prórroga del peaje del Huerna fue ilegal
- Así será el calendario escolar 2024-2025 en Asturias: mismo día de inicio para todos y tres descansos pedagógicos
- Si eres un amante del buen comer, La Chalana te trae algo que te interesa
- Otro hito para la llegada de los Avril: el primer AVE con pasajeros completa un trayecto Madrid-Asturias en el que "se va muy bien
- Las reacciones en Asturias al anuncio de Pedro Sánchez: del "no todo vale" de Barbón, al "victimismo" de Queipo
- El mejor supermercado": el curioso tatuaje que se ha hecho una persona sobre una conocida marca asturiana
- El Principado se compromete a "seguir trabajando para eliminar el peaje" del Huerna y el PP dice que la prórroga "estaba dentro de la legalidad
- El peaje del Huerna se prorrogó para obtener más dinero: LA NUEVA ESPAÑA desgrana el dictamen de la UE que pone en entredicho la tasa de la autovía
