Les panderetes ilustraes de la porruana Nieves González, artista revelación cola so reinterpretación de la tradición asturiana

La pintora y diseñadora Nieves González Pérez –tamién profesora de Bachilleratu d'Artes en Siero– tien encargos hasta 2025. Convirtióse nuna de les artistes revelación d'Asturies gracies a los sos logotipos pa grupos musicales, cartelos de fiestes, les camisetes que diseña y, sobremanera, les panderetes ilustraes a mano –rotulaes con dichos, refranes o cantares populares– coles que reinterpreta y moderniza la tradición asturiana. 

Esta llanisca de Porrúa de 35 años reconoz que ta plasmada pola demanda que tien la so obra. Lo último: acaba de firmar el cartel de la Folixa na Primavera de Mieres. "Cuando acabé Belles Artes en Madrid espunxi en galeríes d'arte y nunca vendí nada. Intentelo de munches maneres y nun me funcionó enxamás nada. Pero, de sópitu, les panderetes tienen ésitu y foi lo que nunca intenté", apunta con humor.

Entamó too en 2018, xusto cuando empezó a trabayar de profesora. Al tiempu, "cuandu menos me facía falta yá", la so carrera d'ilustradora y diseñadora empezó a despegar. Primero fixo diseños pa la marca de ropa Wanderlove. Depués, una amiga pidió-y que pintára-y una pandereta con dalies, flor característica de la fiesta de Porrúa. Nieves González pintó más panderetes y empezó a perfilar una llinia bien personal, influyida pol llinguaxe gráficu del tatuaxe pero tamién pola pintura medieval. Ye una reinterpretación formal y de conteníos: "Hai munchos elementos de la tradición que pueden treslladara a l'actualidá, o rellacionase con ella, como l'amor, les decepciones, los refranes... Pero la tradición tamién tien una parte desfasada qu'intento modernizar. Ye mui machista, por eso dacuando camudo les lletres o convierto a los personaxes en femeninos", indica.

En pasando'l confinamientu pola pandemia contactó con ella la marca Puru Remangu –otra referencia na modernización de la identidá asturiana–, pa la que fixo una camiseta. Eso, y la collaboración col grupu "Dixebra" pa ilustrar el so llibru-discu "Ente la niebla", multiplicó la so visibilidá. Depués llegáron-y pidimientos de logotipos de grupos musicales (la mayoría rellacionaos cola escena folk), el cartel de les fiestes de Porrúa y d'otros pueblos llaniscos de la contorna. A partir d'equí, fueron creciendo los encargos. Tou a meyor menos una cosa: Nieves reconoz que nunca se-y dio precisamente bien tocar la pandereta .