Nueves claves sobre l'avieyamientu de les célules madre musculares

Un grupu d'investigadores de la Universidá d'Uviéu afayó por qué les célules madre de los músculos pierden la so capacidá de rexeneración conforme s'avieya. Esti afayu "podría tener implicaciones na comprensión y tratamientu de la perda de masa muscular asociada a la edá", indica la institución académica nun comunicáu espublizáu esti día. 

El trabayu asoleyóse na revista "Cell Death and Disease", de máximu impactu na so área de conocimientu. L'estudiu foi lideráu por investigadores del grupu CROS, perteneciente a la Universidá d'Uviéu y miembru, al empar, del grupu OSKAR, del Institutu d'Investigación del Principáu d'Asturies (ISPA). 

Realizada por Yaiza Potes y liderada por Ana Coto Montes ya Ignacio Vega Naredo –profesores del Departamentu de Morfoloxía y Bioloxía Celular d'Uviéu–, la investigación amuesa que les célules madre musculares avieyaes nun son quien a activase y estremase correchamente por cuenta de dos motivos. Primero, por un fallu na vía de señalización p66Shc y, segundo, pola perda de la capacidá autofáxica. Les investigaciones sobre p66shc revelen que desempeña un papel regulando los niveles de radicales llibres y la esperanza de vida. Les célules madre musculares, a midida qu'avieyamos, entren nun estáu prematuru de senescencia irreversible que-yos torga reparar el texíu frente a una mancadura, lo qu'acaba contribuyendo a una importante perda de masa y fuerza muscular col pasu del tiempu.