Les mesmes instituciones que permiten que s'envenenen los alimentos que comemos torguen la venta directa de productos crudos como lleche, güevos o mantega apelando siempre a la seguridá alimentaria, la hixene y la salú de los consumidores. Anque tolos casos d'envenenamientu masivu de la población que salieron a la lluz, como les vaques lloques o la peste porcina, son consecuencia (lóxica) de la macro-industria alimentaria, onde los beneficios tán perriba de la calidá del productu final y, por supuestu, de la salú y la nutrición de los consumidores. Pero los diferentes estamentos públicos, dende lo estatal hasta lo municipal, preocúpense más pol peligru públicu que representen les productores pequeñes coles sos docenes de güevos cargaes de salmonela que de les grandes empreses agroquímiques que lleven décaes contaminando l'agua, l'aire, la tierra y a les sos habitantes. Tán enterrando los modelos tradicionales de producción, los circuitos cortos de comercialización y la riqueza (non cultural y social namás) que conlleven. Mientes froten les manes con proyectos que, independientemente del sector y del coste económico-ambiental, siempre suelen ser lucrativos pa unos (pocos) y nocivos pal restu.
El mesmu Conceyu que prohíbe la venta de güevos nel mercáu selmanal da llicencia pa construir un crematoriu cerca de la escuela, l'ambulatoriu y les cases de la xente. ¿Ye más peligrosu comer güevos de casa que respirar fumu cargáu de cianuru? La respuesta paez evidente. De fechu, la llicencia d'obra del crematoriu ta nos tribunales gracies a la movilización del pueblu.
Dan ganes de pidir a los políticos que nun se preocupen tantu pola nuestra salú o, polo menos, que cambien el focu, pa ver la lluz sobre los procesos escuros de producción agroalimentaria y dexar que sobrevivan (y se multipliquen) les práctiques tradicionales d'economía de subsistencia que, sin ser tan lucrativa, ye ambiental y socialmente muncho más sostenible.
