–¿Tas bien, Paco? Tuvisti tres hores nel váter...
–Nun soi Paco, soi the Postman.
–¿Qué, ho?
–¡Traigo un mensaje pa vosotros!
–¿Eh?
–Nun vengo del váter, vengo del futuro.
–¿Que qué, ho?
–¡Convida a estos chavales! ¡Ta too pagoooo!
–¡Anda, nun bebas más que ya tas buenu!
–¡Y tanto! ¡Acabose’l pesimismu! ¡Tamos petándolo!
–¿Ónde, ho?
–¡Les cuenques son el sitiu ideal pa trabayar y pa vivir!
–¡Meeeeee!
–¡Chissssst! ¡Lo de la descarbonización ta superao!
–¿Cómo ye, ho?
–Acabose’l trauma de los pozos cerraos, los castilletes oxidaos… ¡Fízose una transición energética de la hostia!
–Meca, esti flipa.
–¡Nun flipo, no! Los polígonos industriales del Caudal y del Nalón tán a tope. Hai empreses a esgaya, ¡Trabayu pa toos!
–¡Hai que saber mexalo, campeón!
–¡Chist, el suelu industrial volvió a furrular! Acabaron los contratos temporales y les jornades a tiempu parcial. ¡Nun hai precariedá laboral!
–¿Visteis qué peu garró, el cabrón?
–Ya nun hai ni argayos, tán les calles petaes y el campus llenu de universitarios...
–Esti durmiose nel váter y soñolo.
–¿Qué váter ni que...? ¡Vilo nel futuro!
–Ah, sí, ¿y qué más viste?
–Energíes limpies, recursos naturales. ¡¡¡Vilos floreceeer y me digo a mí mismuuu: What a Wonderfuuul Woooorld!!!
–¡Anda, Paco, deja de cantar! ¡Menudu tablón!
–¡Con eso de la economía digital tán les cuenques llenes de chavales que nun paren de trabayar. Centros de I+D+i y EBTs…
–Sí, ho. Y ventanes de PVC, ¡jojojo!
–Nun te rías, Fito, que tán desarrollando lo de Inteligencia Artificial nel campus de Mieres. Y somos punteros.
–¡Cagonrós! Que fagan inteligencia pa robots habiendo paisanos tan necesitaos...
–¿Eso va por mí, ho? ¡El futuro ye nuestru! ¡Vengo d’allá!
–¿Pero de qué añu vienes, Paquín, de 2050?
–Bueno, Fito, lo de los años ye relativo...
–¿Entós?
–Según los mayas acabábase el mundo en el 2012 y según los políticos acabábase la variante de Pajares en 2010.
–Y tú quedaste dormíu nel váter y apaeciste en 2060. Díjete yo: nun tomes más sidra, que lleves más de la cuenta.
–¡Wuuaa! ¡Teníes que ver la Ruta del Alba, qué guapa la dexaron!
–¡Meee! ¿Tuvisti de monte, ho?
–Y de playa.
–¿Rodiles? ¿Xixón?
–No, home, no. Na playa fluvial de La Chalana. Un ambientazu de la hostia, y tuvi colos piragüistas del centru de altu rendimientu de Tanes.
–¡Madre mía, Paquín, lo que tien quedase dormíu nel váter...!
–Yo sigo mis sueños, Fitín, ellos saben el camín.
–Mejor garrabas el camín de casa.
–¿Por?
–¿Nun ves que la sidra te fae dañu?
–Selo yo que me fae dañu, pero yo la perdono.
–¡Tas guapu!
–La que ta guapa ye la cuenca. Bueno, les dos. Entre les empreses TIC que mangaron en El Entrego y que Mieres paez Massachusetts…
–¿Por?
–¡La industria 4.0! ¡Videojuegos, Inteligencia Artificial, la puta su madre, chaval! ¿Y les mines? Si ves en qué se convirtieron, flipes.
–¿Por?
–¡Almacén de medicamentos nel pozu Santiago, invernaderos subterráneos, centros de “big data”, entrenamiento en rescates, la de mi madre…!
–Hala, Paco, venga, tira pa Llaviana...
–Nun hai prisa, col soterramientu llego en un momento. Además tará lleno turistas, coles rutes literaries, los museos, el aprovechamientu del nuestro patrimonio industrial...
–¡Tas guapu, Paquín! ¿Cómo garraste un peu así?
–Vi la luz, Fito, ¡la luz!
–¿Qué luz, ho?
–Les cuenques nun se reactiven con convenios, ¡ye cosa de culetes!
–¿Qué, ho?
–Con un poco de resiliencia y unes cajes de sidra supéranse los traumas y potencies la felicidad.
–¡Sí, home, vaaaaaaa!
–¡Ta tooo pagooo! ¡Tamos petándolo!
–¡Anda, tira pa casa!
–¡Dejailu, ho! Probe. Durmiose nel váter y soñolo.
–¡Ye igual, qué más da! ¡Que polo menos un día resuelva la sidra lo que nun resuelve la política!
–¡¡What a Wonderfuuul Woooorld!!!
–Canta, Paco, canta. ¡La madre que te sibló!
