Acércase una d’eses feches marcada en colorao nel calendariu. Los nervios, la emoción y la ilusión van medrando según pasen los díes y nos arimamos a la llegada de los Reis Magos, pola que tanto se nagua. Mentanto, los más pequeños yá preparen les sos cartes pa qu’a les Sos Maxestaes d’Oriente nun se-yos escaeza entregar nin un solu regalu. Los neños del colexu públicu Francisco Fernández González, de la localidá de Cancienes (Corvera), lleven selmanes escribiéndoles n’asturianu pa un concursu entamáu pol conceyu de Corvera.

Mesmo y como se vien faciendo dende va dellos años, el Consistoriu, al traviés de la Casa de la Llingua-Serviciu de Normalización Llingüística de Corvera, tien entamáu’l concursu llamáu “Carta a los Reis Magos n’asturianu”. La iniciativa consiste en redactar la carta a los Reis na nuestra llingua. Esa carta distribuyose yá pelos colexos del conceyu y la selección de les misives ganadores va realizase en dos categoríes conforme al nivel educativu (primer y segundu ciclu de Primaria). Son más de cien escolares de Corvera qu’estudien Asturianu los que fueron llamaos a participar na actividá.

La carta tien que s’entregar nel Centru Sociocultural de Les Vegues enantes del 30 d’avientu. Los neños ganadores van recibir el premiu a la meyor carta escrita n’asturianu’l próximu 5 de xineru, un premiu que consiste nun llote de llibros n’asturianu –con cuenta d’animar a la llectura a los más pequeños– y un vale de 100 euros pa mercar material escolar en comercios corveranos. Los llibros dónalos la Dirección Xeneral de Planificación y Normalización Llingüística del Principáu d’Asturies y na actividá collaboren los colexos corveranos y l’Asociación d’Ames de Casa de Les Vegues.

Nel colexu de Cancienes coordina l’actividá la profesora Loles González. Toles clases ente primeru y sestu cursu de Primaria yá escribieron la de so. Los postreros en facelo fueron los de cuartu. Toos ellos aguarden la llegada de los Reis Magos como agua de mayu y yá tienen claro lo que van pidir. “Ropa, un funko, una muñeca Rosaura y la casa de les LOL”, esplica la neña Sara Mesa, de nueve años, que na so carta nun escaeció a naide: “Punxi coses pa toos”. Pela so parte, la so compañera Daniela María Labrado, tamién de nueve años, asegura que “escribir n’asturianu nun me cuesta nada”. La pequeña Labrado tamién tien claro los xuguetes que nun pueden faltar el día de Reis debaxo del so árbol de Navidá: “El castiellu d’Enchantimals, ropa, un Slime y delles muñeques”.

Sergio Pantiga, tamién de nueve años, tienlo too previsto pa la llegada de los Reis: “Na mio casa fixi una pista d’aterrizaxe con lluces pa cuando vengan”. Mientres allampa por que llegue’l día, na so carta nun pueden faltar “el xuegu de Fórmula 1, un reló, una televisión y unos cascos”. El pequeñu tamién dexó un buecu pa la so hermana: “Pidí-y un coche electrónicu”.