Les fueyes enllenen los parques, los montes: yá aportó la seronda, la estación na qu’hai que garrar la chaqueta, magar qu’esti añu faiga más calor que nos años caberos. En el CRA Oscos nel aula de Samartín sábenlo perbién. Y como diz el maestru de gallegoasturianu, Juanra Iglesias: "Os nenos e as nenas da escola de Samartín del CRA Oscos tán trabayando estos días l’outono, xustamente’l magosto".
La escola rural cunta con cinco rapacinos d’Infantil y diez de Primaria. "A pasada semá, nel proyeto que se ta facendo dende l’área de gallegoasturianu, os nenos foron al monte El Coto, nas Pontes (Samartín), unde correron, xogaron e tamén coyeron castañas, landres, mazás e outros frutos d’outono", desplica Iglesias.
Laura López Jardón pañó dellos oricios y castañes, lo mesmo que Diego Gómez Villamea. Tamién tuvieron tiempu pa llanzar les fueyes al aire y esfrutar d’una xornada pel monte. "Estas clases son mui boas pra os nenos", espón el maestru de gallegoasturianu. "D’este xeito os pequenos conocen inda máis el sou entorno e aprenden a valorar a riqueza natural que temos, todo nun clima d’inmersión llingüística en gallegoasturianu", añede.
Tres dellos minutos nel monte El Coto, los rapacinos tornaron pa clase. El trabayu sobre los frutos sigui na clase, col analís d’una poesía ensin autor conocíu y que lleva por títulu "Frutos del outono".
En versu, esi poema da un repasu a dellos de los productos serondiegos. "As noces y as almendras, piñóis y uvas tamén, granadas y mandarinas contigo compartiréi (...) qué ricas son as mazás, con elas faréi un pastel y as castañas asadas, bañadas de rica mel", diz esi poema escritu nun papel que tien esos frutos a un llau y al que los rapacinos del CRA dan-y color p’amuesar non solo con palabres esi calter serondiegu de tonos amarronaos como’l de les castañes o les bellotes.
L’Academia convoca un concursu pa Primaria y Secundaria
L’Academia de la Llingua Asturiana (ALLA) convoca un nuevu concursu, la Olimpiada escolar de redaición "Urbano Rodríguez". En rialidá son dos convocatories, una empobinada al alumnáu de Primaria y otra pa Secundaria y Bachilleratu. La inscripción ha facese fasta’l 4 de payares y dende los centros educativos. Cada concursu tien dos prebes. La primer ye a distancia y sincrónica, con tolos participantes al empar y al traviés d’internet. Tres la primer criba, los finalistes dirán a Uviéu, onde yá nuna preba presencial han responder a una serie d’exercicios nos que los rapacinos falarán d’un asuntu concretu. L’ALLA pon dellos exemplos de les prebes na so páxina web tanto pa les modalidaes de llingua asturiana como de gallegoasturianu. Asina, ún de los modelos plantega a los escolinos de Primaria que despliquen el so xuegu preferíu. Tienen que facer un testu nel qu’han de salir pallabres qu’empiecen por "ll", tres colores y un mes de la seronda. Pal concursu de Secundaria y Bachilleratu, la preba ye similar magar que con más dificultá. Nel exemplu qu’ufre l’ALLA na so web hai que falar nun testu d’educación, responder a delles entrugues amás de qu’apaezan delles pallabres como un alverbiu fináu en "u", como davezu, o dalgún sustantivu qu’entame por "ll" y incluyir "moblame", que ye conxuntu de muebles.
