Esti mes de mayu la poesía inunda tolos requexos del planeta

"La poesía ye un arma cargada de futuru", pallabres del poeta Gabriel Celaya, que tentes veces nos faen reflexonar. Qué pena que les armes nun disparen versos qu'inunden el corazón de la tristura. La tristura qu'estos meses ye protagonista, xunto coles sos collacies, la soledá, l'aburrimientu, el desesperu?

A lo llargo de la historia alcontrámonos con armes potentes, non precisamente cargaes de versos, armes que disparen engafaes contra nós. La guerra asola'l mundu en distintos puntos del Planeta y, nestos tiempos, una guerra con un arma diminuta y mortífera ta asolándonos en forma de pandemia a nivel mundial. Nun sabemos el futuru.

Quédanos, eso sí, agarranos a otros enfotos, a la poesía, a la música, al'amistá, al amor, a la empatía, a la solidaridá. Quédanos abrazanos y querenos más, ser más solidarios y reflexonar sobre la euforia y la prepotencia que reinan na sociedá y nun nos dexen tiempu, nesti mundu de la priesa, pa'alcontranos con nós mesmos nin p'alcontranos cola realidá que nos arrodia.

Esti mes de mayu, celébrase'l XIV Festival de la Pallabra nel Mundu. Un movimientu poéticu qu'enllena'l Planeta de versos. Intentamos col arma de la poesía disparar versos, apurrir pallabres que son aliendo, más que nunca, pa recuperar unos momentos de felicidá. Aprovechar el feliz momentu de lleer o escuchar un poema, magar que la felicidá nun seya duradera. Too ye efímero nesti camín que recorremos.

Los y les poetes tomamos la pallabra nesti mes de mayu, y tamién nesti tiempu de zarramientu. Queremos dar un respiru d'aire frescu colos nuesos versos, queremos inundar l'ambiente d'amor, de lluz, y de paz, denunciar la guerra, la violencia, la probeza, l'egoísmu, el materialismu y la represión. Nesti sen, cuadren mui bien estos versos del poeta Pablo Neruda: "La poesía es un acto de paz/ El poeta naz de la paz (?)/ Yo nun vengo a resolver nada/ Yo vine aquí pa cantar/ y pa que cantes conmigo". Qué faltos tamos de poder cantar, versos y cantares, de que la poesía y la música s'añere nos corazones. La pallabra pola paz y la llibertá. Cantar al amor y a les coses pequeñes. Cantar la esperanza en recuperar los abrazos, l'optimismu y l'allegría. La palabra del poeta ye l'arma p'apaciguar al mundu. Como nos dexó dicho Octavio Paz, "?La actividad poética es revolucionaria por naturaleza. Plegaria al vacío, diálogo con la ausencia, el tedio, l'angustia y la desesperación?".

Esti añu nun podemos participar nesti Festival de la Pallabra de forma presencial, pero facémoslo a traviés de la rede. La voz de los poetes ye protagonista en munchos llugares, en munchos países. Nesti Festival participen distintes instituciones y coleutivos, participen escritores, neños, poetes noveles y poetes yá consagraos, llectores, periodistes, y otres persones venceyaes a la poesía.

Convídovos a visitar la páxina que dende l'Asociación d'Escritores d'Asturies creamos en facebook pa esti maratón poéticu y tamién la páxina oficial onde toos tenemos un requexu (FIP-Asturias-20 y FIP Palabra en el mundo oficial).

Deseamos que'l camín s'abra pronto, y que podamos abrazanos ente nós y abrazanos otra vuelta a l'allegría.

Suscríbete para seguir leyendo