Amnesia digital y tal

–¡Guajeeeee! ¿Ónde coño pusiste les llaves del coche?

–Déjalu, Nardo.

–¿Qué ye, que nun les guardó?

–Sí, pero’l probe nun s’alcuerda onde.

–¡Mecagonla…!

–Ai, déjalu yá.

–¿Pero a ti te paez normal?

–Claro, la memoria dura cada vez menos, nes nueves generaciones nun…

–¿Quién lo dijo?

–Los expertos en neurología, Nardo. Ye llei de vida.

–¿Que qué, ho?

–Les neurones, la tecnología…

–¡No lu defiendas, Mari! ¡Tien menos lluces que’l coche de los Picapiedra!

–Probe, déjalu, tá en su mundu.

–¿Qué mundu?

–El mundu digital, Nardo, viven a otra velocidá, a un ritmu tremendu.

–Pero…

–El tiempu va demasiáu rápidu, los acontecimientos van demasiáu aprisa, les noticias atrópense y los descubrimientos…

–¿Qué me tás cuntando, Maricarmen?

–El probe tien problemas pa seleccionar y absorber la información…

–¡La madre que lu parió!

-¿Qué culpa tengo yo?

–Tamos guapos, Mari.

–Nun se concentren, bobu, tán distrayíos. Y claro, la memoria…

–Pues como nun aparezcan les llaves, va llevanos a recostines a la playa.

–Probes. Entemecen los entornos virtuales colos reales. Y enriba, la multitarea.

–¿La qué, ho?

–Almuerza col Tik Tok y la tele puesta, estudia mientres oi música, caga col feisbu, fala mientres guasapea…

–Voi da-y una hostia que me va a coger cariño, fíjate lo que te digo.

–Déjalu, probe.

–Tá bien espuestu, tien muchos estímulos al so alrededor. Y el celebru pierde l’habilidá de recordar.

–Pero pa pedime perres pal Aquasella, d’eso alcuérdase. ¡Oveya!

–Non te pases, Nardo. Seguro que lo apuntó nel teléfono. Ye bien inteligente.

–¿El nuestru guaje, ho?

–No, Nardo, el teléfono.

–¿Y vamos quedanos sin dir a Bañugues por culpa esti manguán?

–El probe nun atopa les llaves.

–¡Que les busque en Google, no te jode!

–Probe.

–Yera lo único de lo que tenía qu’alcordase, les llaves, les puñeteres llaves.

–Bonu, anda. Si non, comemos la empaná en casa.

–Sí, ho. Yo en casa nun quedo. Que saque les sielles, la nevera y la mesa plegable, y vamos andando.

–Sí, ho.

–Que camine, que ye deportista.

–Déjalu, probín, nun ves que tá mal.

–¿Pero qué tién, qué ye lo que tién?

–Amnesia digital, Nardo. Tá mal. Tién amnesia digital.

www.parandoenvillalpando.com

Suscríbete para seguir leyendo