Soldáu y santu

Diego Canga Fano presentose oficialmente a los sos potenciales electores asturianos, el día de la Constitución, subiendo a Twitter una semeya de mocedá, caballeru cadete aspirante a l’alferecía qu’arima la bandera a los llabios de la que pasa al pie d’ella colo que tuvo que ser pasu marcial (l’estatismu fotográficu nunca dexa testimoniu del cumplimientu de tal requisitu) aquella remota mañana de la xura, cuando corría la década de los 80. Habralos que se-yos escape’l vínculu ente semeya y festivu, pero esiste: la fórmula a la que respuende la tropa nestos actos, enunciada con megafonía viril y tonante, pide tres coses: morrer pola patria (namás siendo necesario, tampoco ye qu’haya que lo facer a lo xole), fidelidá al Rei (nel casu de Canga y míu, tamién alférez de Complementu, fue al qu’agora vive n’Abu Dabi, ya ve usté qué desperdiciu de xuramentu) y, ya puestos, a la Constitución. Pero nun dexa de ser políticamente pintoresco que la declaración constitucionalista del agora caballeru senior aspirante a la presidencia del Gobiernu d’Asturies tenga esi aire… umm… retro, vamos dicilo asina. Nun hai xorra nesi anzuelu, les truches que lleve’l pescador pa casa ya taben en cestu.

L’avatar de Twitter, la semeyuca del titular que-y preside cada publicación, nel casu de Diego Canga, preséntanoslu (cuando ún escribe esti artículu, qu’esa iconografía ye mudable) en funciones pa la Xunta Europea: sonriente, de mediu cuerpu detrás d’un atril, micros delantre y, al fondu, xusto percima la cabeza, bien centradina sobre’l cogote, la corona comunitaria de les doce estrelles bailando la danza prima nel conocíu firmamentu de tela azul. Usté ya sabe, seguro, qu’esa corona ye d’inspiración mariana, la de la Milagrosa, un casu flagrante d’apropiacionismu. Asina que, nel mesmu tweet, vimos al pretendiente del PP como militar y como santu con aureola. Resulta consecuente qu’una de les primeres actividaes anunciaes pol candidatu seya visitar a la Santina en Cuadonga. Mala asesoría, d’otra manera: la inquilina de la cueva ye residente ilegal, ensin DNI nin derechu al votu.

A mi paezme un marafundiu gastar tanta virtú como atesora Canga nuna tierra, país, provincia o macrochigre, verbigracia Asturies, que, pa dir tirando, arréglase con cualquier cosa. Quiero decir que Feijoo (ensin tilde: ún sabe d’ortografía) tampoco tenía falta de privar a Europa d’un activu fundamental, irreemplazable, según nos lu vienen presentando, pa mandalu equí a pagar compensaciones por ataques de los llobos o a aplaudir al Campoamor cada mes d’ochobre. Con Canga dedicáu a estos insignificantes llabores llariegos, ¿quién va ser a parar la guerra d’Ucrania? Pa les caxigalines de casa, piensa ún, bien valíen los afiliaos del Partíu Popular. ¿O ye qu’en Madrid nun atopen a naide residente al norte del Negrón, con carné y pagu de la cuota al día, que tea, polo menos, a l’altura d’Adrián Barbón? Ún piensa que, de ser militante astur del PP, diba torcéseme un poco’l focicu viendo’l despreciu a los afiliaos, el protagonismu rampante que se-yos da a los "independientes", véase l’alcalde de la capital o esti aspirante a la presidencia, que nunca pegaron un cartel electoral pa otros y, agora, esos otros tienen que los pegar pa ellos.

En fin: ún ve-y un dalgo rancio a esti candidatu emigrante, que vuelve a casa en Navidá, como’l turrón, y da-y por pensar que la operación Diego Canga ye un dexar correr el Tiempu mientres que, voraz, va royendo y aferruñando, pasín a pasu, a Adrián Barbón, que, de momentu, tovía tien el cromáu en bones condiciones. Más alantre, cuando’l ferruñu socialista esmigaye ente los deos, llei de vida, ya llegará’l momentu d’Álvaro Queipo.

Pase usté un bon día y acuérdese de que les ringleres qu’acaba de lleer tán escrites nuna llingua inconstitucional que, oficialmente, nun esiste.

miliorodriguezcueto.wordpress.com

Suscríbete para seguir leyendo