Pillaje de paraguas

–Tien ehí un paragüeru.

–Selo yo.

–El paragües, señor.

–¿Qué, ho?

–Debe usté ponelu ehí, nel paragüeru.

–Los coyones.

–Non, el paragües. Debe usté poner el paragües nel paragüeru.

–¡Que non, coño, que non!

–¿Cómo ye, ho?

–El paragües va siempres conmigo.

–¿Pero nun ve usté que ta moyando’l suelu? Ta’l suelu húmedu.

–Yo tamién, toi más húmedu qu’un besu de perru.

–¡Oiga! ¡Dígo-y que dexe’l so paragües nel para…!

–¿Para qué, ho? ¿Pa que me lu vuelvan robar?

–¿Eh?

–Hai muchu rata nesti chigre.

–¡Oiga! Arsenio…

–Que nun nací ayer, cuidao, que llevo munches pingaduras enriba.

–¿Qué diz?

–Nun gano pa paragües. Merqué unu fechu a mano, preciosu, salí con Dorotea…

–¿La so novia?

–Non, la borrasca. Paré equí a tomar algo. Y me lu mangaron. Al otru día vino Tatiana.

–¿Otra borrasca?

–Non, la mio muyer. Merqué otru, y llegaron Celine, Elisa, Olivia, Renata…

–¿Amigues?

–Non, coño, ¡borrascas! Y cuanta más borrasca más robaparaguas. ¡Hai equí más chupones que nel "casu Koldo"!

–Arsenio, faiga usté’l favor.

–¿Qué favor nin qué mi madre? Ente nubes, chubascos y ciclogénesis, yá llevo seis hurtos y trés cambiazos.

–Déxelu ehí, faiga’l favor. Amás, el so paragües ta más rotu que la capa d’Ozonu.

–¡Home, va! ¿Qué quies, que traiga unu nuevu pa que me lu vuelvan cambiar?

–Ye qu’ente’l descensu térmicu y les raches de viento…

–Racha la mía.

–¿Por?

–¡Tolos josdeputa mánguenme a mi’l paragües!

–Qué fuerte, Arsenio, desconfiar asina de los sos vecinos.

–Por culpa d’ellos llego a casa más moyáu que la ventana d’un submarín.

–Nun son ellos, Arsenio, son les precipitaciones.

–¡Pa convidar nun se precipiten, non!

–¿Qué, ho?

–Que son más tacaños qu’el qu’inventó’l carpaccio.

–A ver, usté tampoco ye mui desprendíu que digamos.

–¿Cómo ye, ho?

–Respire, Arsenio, qu’usté nun respira por non regalar CO2 a les plantes.

–¡Chaval, nun me faltes!

–Ye la verdá.

–Yo si non convido ye porque gasto la mitá del sueldu en paragües.

–¡Ande, déxelo nel paragüeru! Atienda usté a razones.

–Nin de coña. ¡Esto ta llenu d’aguarones!

www.parandoenvillalpando.com