El conceyu d'Onís, conocíu pola guapeza de los sos picos y las sos vegas, tien ente los sos jiyos nombraos al empresariu Francisco de la Vega Pérez (La Robellada 1893 - Madrí 1957). Pastor, teyeru y mui probe de críu, de rapaz joi a la capital d'España onde jézose ricu na hostelería pero cuando vivía nesta villa alcordábase siempre del pueblín onde naciera.
Casáu con una gallega, tevo tres jiyas y 21 nietos y, amás, escrebía. Jacíalo en finu y n'asturianu, nuna lluenga grande del mundiu y nel modu parllar de la tierrina. En 1945 salió en Madrí un llibru con versos d'elli onde apaez esti endecasílabu mui costumbrista, jechu en 1924 y dedicáu a Constantino Cabal (Nostalgia. Poesías, páxinas 175 a 177):
Ante una reineta
Reina, que no reineta de la fruta,/manzanina xentil, qu'asta mio mesa / lleguesti desde el propiu paraísu,/ de dulcinos recuerdos mensaxera; /quien así te saluda ye un paisanu, /que por símbolu tien d'aquella tierra / que mugan con sus aguas clariquinas, / ríos tan xuguetones como el Güeña.
Y, así me salve Dios, que lo de símbolu/ ti bien que ni pintáu, dulce reineta,/ pues eres colorada y suaviquina / lo mismo que papinos de canguesa, / llozana como senos de llanisca,/ melosa como el bable de la tierra,/ que, a juerza de ser dulce, jazse almíbar / en boca de muyeres xixonesas?
Y puestos ya a evocar cosinas dulces,/ ayuday un poquín a mio mollera,/ cuntando las escenas pueblerinas / que visti del pumar entre la jueya.
Dimi tú si ñacisti en algún güertu,/ oriella de la clásica caleya,/ o crecisti e'nalguna pumarada,/ del Sella o del Nalón pe la ribera.
Esplícami el misteriu pelegrinu,/ entovía no explicáu pe la cencia,/ de por qué cuando sube la cazumbre/ oculta p'entre el tueru y la molleya, / aparez en las quimas del manzanu/ convertida en florinas que asemeyan/ ensambres de blanquinas mariposas / que vienen añunciando la collecha.
Dimi tú si en la quima en que ñaciste,/ jacieren algún ñeru las miruellas,/ que escapó, como tú, de la rapiña, / de los críos que güelven de l'iscuela,
Y dimi del idiliu paxareru,/ todu cuantu tú visti, cuantu sepas; / como jueren jaciendo al blandu ñero,/ con mofu, con herbinas, con baretas,/ poniendo unos güevinos azulaos,/ que llueca la páxara, después güera,/ mientras mira, encelada, que el miruellu / ronda gayasperu, otra miruella.
Y dimi, en fin, si la manzana célebre,/ que dioy al padre Adán, la madre Eva,/ era inania, mingana, balsaína,/ o era, como tú, de las reinetas;/ pues, siendo de esti modu, bien podría/ Dios Nuestro gran Señor, baxar la pena,/y, aunque al fin, del Paraísu les echara,/ mándalos para Asturies, que a mio cuenta,/ é lo más apaecíu al Paraísu,/ que podíen encontrar sobre la tierra.
