Esta fin de selmana va tener llugar en Cangas del Narcea ún de los alcuentros más importantes no que fai a la recuperación y envaloración de la cultura asturiana: el congresu internacional "Los xuegos tradicionales güei". El congresu, qu'organicen l'Asociación del Bolu Vaqueiru, la Sociedá Etnomotora Asturiana, el Conceyu de Cangas del Narcea y l'Asociación Europea de Xuegos y Deportes Tradicionales, va suponer un gran pasu alantre no que fai al conocimientu de los nuesos xuegos, como los bolos vaqueiros, el valtu, etc, y la so conexón coles modalidaes tradicionales de la nuesa redolada.
Ye nesti contestu que va tener llugar la mesa destinada a "Enseñu y xuegu", mañana vienres 29 de marzu a les 19:00 nel Palaciu d'Oumaña, onde podrá comprobase de la mano d'especialistes procedentes d'universidaes cántabres, portugueses, catalanes o aragoneses en qué midida los deportes tradicionales pueden meyorar y conducir el procesu de deprendizaxe de materies bien estremaes, y ente elles la llingua asturiana. Rescampla'l fechu de que los xuegos tradicionales y l'asturianu pueden venceyase fácilmente pente medies de la educación, como afirmen davezu la Sociedá Etnomotora Asturiana y el so presidente, Carlos Suari.