Nos últimos tres años Inaciu Galán tien asoleyao tres poemarios. Ello permite suponer el vaciamientu de los caxones onde l'autor dexaba curar los testos o una intensa fiebre versificadora. En cualquier casu, Inaciu Galán aporfia nel xéneru poéticu depués de percorrer una llarga sienda pel monologuismu, la narrativa o'l periodismu. Nes ruines de la nueche y les hores ganó'l premiu Fernán-Coronas na so edición de 2016 y tuvieron que pasar dos años pa vese publicáu por aciu d'eses rareces cuasi invalidantes que caracteriza a la lliteratura asturiana. Dicho sía de pasu, habría que da-y una vuelta al desaxuste temporal na publicación de llibros premiaos por parte de la alministración pública asturiana, responsable voluntaria o involuntaria d'estos fenómenos editoriales.
Volviendo al llibru, el poemariu entama, continua y termina col tonu íntimu, llíricu y proféticu tan queríu pa la lliteratura asturiana. La unidá de tonu y estilu france, sicasí, na diversidá de temes. Hai, polo xeneral, un diálogu poéticu col "yo" y el "tu" lliterarios. Una construcción de la identidá como dicotomía o espeyu. Asina, atopamos un machadianu "Silenciu", qu'indica un marcáu carácter diarísticu nel llibru. La infancia, los primeros amores, los branos interminables como una llanada mediterránea o les piedres que cayen nel pueblu al empar qu'esbarrumba la memoria. Los branos en toles formes posibles que recueye'l poemariu son esi tiempu de sosiega y mirada aliella qu'alimenta les alcordances como una arcadia perdida y recuperada. La señaldá pal poeta asturianu abúltame aínda más inevitable que pal poeta d'otra llingua. Esti llibru vien a confirmar esto, y dicho ensin deméritu nengún. El personaxe poéticu escargata nel recuerdu a la busca de la identidá. Un tema tan vieyu o tan nuevu como se quiera o consiga: too depende del tratamientu que se-y dea. Nesti casu, apréciase un mieu al escaezu, al argayu de la memoria, de quienes fuimos o d'aquellos de los que venimos: "Aquel horru nun tardó / en perder la paciencia / y dexase cayer, fundiendo / les alcordances con él".
Hai tamién poemes de circunstancies, los más averaos al diariu y a la voluntá de guardar en papel la impresión personal baxo la forma de los versos. Una manera de dicir que'l poeta tuvo equí: "Paisaxe nocherniegu", "Día de branu", "Nueche d'inspiración". Tamién hai sitiu pa los versos sobre l'oficiu de la poesía, les maneres y maníes del escritor, la ocurrencia xenial, les dificultaes de la escritura, la puesta n'escena d'una llectura poética (y tolo que da a entender), los versos lliberaos al mundu como los llibera Galán cola so publicación (masque otros prefieran arrefundialos pela ventana).
Nostante, ye nel retratu de la memoria (na so más diversa y metafórica utilización) onde Inaciu Galán consigue los meyores versos. Como en "El golor a papel vieyo", "Les últimes piedres", "La xaceda los años", "Mercáu" o "Una vida". La presencia del tiempu baña tolos poemes del llibru y nun ye una novedá na poética del autor xixonés, que tien querencia pol tema a la vista de los anteriores poemarios. El tiempu actúa como catalizador de versos, como vehículu nel que viaxar pela poesía, inclusive cuando'l poema nun mira p'atrás. Mención especial merez "Mete mieu", que reflexona sobre la memoria histórica (cliché necesariu), siempre viva nos llugares familiares. Guapu poema sobre quiénes somos y de lo que fuimos capaces pesie a too: "Cuando recuerdes qu'equí, / a dos pasos d'onde / mos sentamos a tomar / daqué nuna terraza, / con tola tranquilidá / d'estos díes soleyeros, / paró güelu a descansar / cuando llegaba d'una nueche / de caminada, pa ver / si vivía'l so padre / o taba nuna cuneta. / [?] Mete mieu." Asina adicamos pa les ruines que falen de la nueche y de les hores, de pallabres que nos faen y nos dicen, en resume. Nes ruines de la nueche y les hores ye un llibru valoratible, precisu, tiernu, escritu "nuna llingua incómoda". Emocionante como la compañía pacetible d'un amigu.
