Fernando Beltrán, emoción nes aules: alumnos de 16 institutos de Leganés dediquen un homenaxe al poeta asturianu

Foi “una guapa celebración de la lluz, el realcuentru y la palabra poética como palabra útil”. El poeta y nomador asturianu Fernando Beltrán vivió esti día en Leganés una xornada que “nunca voi poder escaecer”. Nun ye pa menos: los alumnos de 16 institutos d'Educación Secundaria de los cursos 2019-2020 y 2020-2021 rindieron un emocionante homenaxe al escritor cola presentación del llibru “Los lápices de Ikea”, que recueye'l so trabayu de collaboración con Beltrán mientres unos meses d'emociones afilaes. 

El Centru Municipal La Dehesilla acoyó l'actu aplazáu un añu pola pandemia, que nun entiende de versos nin de besos, en presencia del alcalde, Santiago Llorente, y la conceyala d'Educación, Inmigración, Discapacidá, Infancia y Mocedá, Virginia Jiménez. Asistió una representación de 60 alumnos y dellos profesores, amás de la esposa y la fía del homenaxáu y amigos como Miguel Munárriz. Beltrán (Uviéu, 1956) pudo garrar coles sos manes “Los lápices de Ikea”, con poemes escritos a partir de dalgún de los creaos por él, y, tamién munches ilustraciones inspiraes nellos. 

Quixo la casualidá, o l'azar de la poesía que cura, que la xornada se celebrare coincidiendo col Día Internacional de la Enfermería, y Beltrán escoyó pa sellala un fragmentu del poema “Tacto”, del llibru “La curación del mundo”, un homenaxe personal a eses manes qu'ensin manes s'averaben a mi”. Refierse Beltrán a los díes ensin lluz que sufrió al ser atrapáu pol covid en marzu de 2020. 

El profesor y filósofu Alejandro Tarantino tamién participó nel homenaxe a un home que, afirmó, “enfila la so escritura como lo faen los panaderos (Ángel González), cola boca, probando la vida…, y siguir probándola por nicios: el traxín del hospital na pandemia, los ruios de la nueche na ciudá de Madrid, la memoria silenciosa de les cais d'Uviéu y l'amor n'elles…, nomar ye catar el pensar de lo impensao, porque toa esperiencia personal ye un trasuntu de l'alteridá a la que s'empobina, porque tou ye voluntá de potencia por y como amor”. 

“Foi too bien guapo”, rellató Beltrán a LA NUEVA ESPAÑA entá trescaláu. “Empezó con un ¡viva'l 12 de mayu! pola emoción del realcuentru, daqué que costó tanto volver axuntase”. Un venceyu bien especial creáu y coriáu nunos tiempos bien duros que l'escritor enllenó de poesía unviando vídeos con llectures de les sos obres. “Dellos poemes que lleeron los alumnos fueron impresionantes, superando inclusive a los del homenaxáu. Una solemnidá entrañable con un corru de xente”. Dos de los participantes confesaron que decidieron ser poetes pola inspiración d'esos vídeos. Beltrán dio-yos les gracies a ellos: reconforta saber que lo que fixisti y compartisti ye útil: “Cuando yá curé un pocu, mirando pa tras dixi que me vieno de maravía esa comunicación, porque taba como n'otru mundu, ensin poner tanta cabeza na recuperación, que foi interminable, porque cada vez que cantaba victoria volvía recayer”. 

Lleó 14 poemes escoyíos polos sos llectores. Y depués, los alumnos fixeron lo propio coles sos versiones. El creador, recreáu. Los profesores tamién dieron la so versión pa reconocer que se sintieron bien acompañaos, sobremanera pola ilusión que s'espardía ente los mozos colos vídeos, “una manera d'abrigase bien guapa. Hubo muncha xente interviniendo online, non solo presencial. Un vídeu de los alumnos d'educación especial púnxonos el pelo llariezu. Precioso”. “Ente'l vértigu y la guapura trescurrió la mañana”, resumió Beltrán. Mientres el coloquiu, un alumnu preguntó “a espetaperru qué se pierde na vida cola poesía, dedicándose a ser poeta”. 

¿Y qué respondió'l poeta? 

“Cunté-y lo que se gana más que lo que se pierde, anque evidentemente tamién se pierden coses cola poesía. Nun ye un oficiu fácil porque ta la guapura y ta el vértigu. Ta'l abrir per dientro y complicase la vida cuando les coses van bien y vuelves poner les carnes sobre la mesa. Ye bien difícil namorar a la xente mozo pol mio oficiu, emburriala a daqué tan duro. Asina que cómo respuendes a daqué asina. Amuéses-yos les dos cares de la moneda, porque cuando escueyes el caxón de les bufandes tamién tas escoyendo'l caxón del fríu”. 

Esi día namás hubo calor.