Cinco cronistes xixoneses, na Biblioteca Xovellanos
Una amuesa sopelexa la vida y la obra de los cinco cronistes oficiales que tuvo Xixón
Arriba, pela izquierda, Julio Somoza y García-Sala, primer cronista oficial de Xixón; debaxo, Joaquín Alonso Bonet. A la derecha, arriba, Patricio Adúriz, y debaxo Luis Miguel Piñera, a la izquierda, y una caricatura de Fabriciano González. / LNE
Asomase a la trayectoria y la obra de los cinco cronistes oficiales qu'hasta la fecha tuvo Xixón ye lo que ufierta la esposición "Cinco Cronistes Xixoneses", que puede contemplase hasta'l 26 de mayu nel accesu al salón d'actos de la Biblioteca Pública Xovellanos. El comisariu de l'amuesa ye l'actual cronista y collaborador de LA NUEVA ESPAÑA, Luis Miguel Piñera, quien rescampla que'l denominador común de los cinco cronistes oficiales que tuvo la ciudá ye que "toos escribimos sobre Xixón y sopelexamos la hestoria de Xixón", considerando qu'esi ye'l so llabor fundamental, amás d'ayudar a otros a que tamién lo faigan. Precisamente l'amuesa inclúi una selección de 94 llibros de los cinco autores.
El primeru de los cronistes oficiales foi Julio Somoza y García-Sala, quien ostentó'l cargu ente'l 24 d'avientu de 1908 y el 25 d'ochobre de 1940. Darréu vieno Fabriciano González García, "Fabricio", del 18 de marzu de 1943 al 1 de payares de 1950. El terceru foi Joaquín Alonso Bonet, del 3 de febreru de 1955 al 6 d'avientu de 1975. Depués llegó la vez pa Patricio Adúriz Pérez, del 30 de xunetu de 1982 al 12 d'ochobre de 1992. Luis Miguel Piñera lo ye dende'l pasáu 9 de marzu. Con modestia, el comisariu de la esposición señala qu'él vese "a muncha distancia" de los sos predecesores, que "colos medios que teníen fixeron enforma; ensin ordenadores, usando la máquina d'escribir. Inclusive Somoza escribiendo a mano. Agora ye too más fácil".
Amás de cinco paneles que resumen la vida y obra de los cronistes oficiales y de la esposición de 94 de los sos llibros en vitrina, la esposición entamada pola Biblioteca Xovellanos tamién inclúi un catálogu de distribución gratuita nel que l'actual Cronista Oficial de Xixón tamién fai mención "a otros cronistes que nun fueron oficiales, como Francisco Carantoña, el Padre Patac, Paco Prendes Quirós y Agustín Guzmán Sancho", toos ellos finaos sacantes esti postreru.
Piñera destaca que na preparación de l'amuesa foi fundamental el llabor del director de la Biblioteca Xovellanos, Fernando García Abella, tanto pola selección de los 94 llibros que se van enseñar na mesma como pola ellaboración de les sos fiches. Amás, tamién indica que na amuesa collaboró'l Muséu del Pueblu d'Asturies, facilitando imaxes históriques de los cronistes oficiales.
“Cola ayuda de la Conseyería de Cultura, Política Llingüística y Turismu del Principáu d´Asturies”.
