La crisis de suministros xeneró escasez en determinaos sectores productivos. El de la sidra tampoco nun ye una esceición, anque pola naturaleza del so productu y l'enclín a la reutilización de les botelles “pel momento nun hai una afectación importante”, dicen los sos profesionales. Les principales esmoliciones de los llagareros de Siero tienen que ver con productos básicos, como'l cartón, y cola posibilidá de que s'estropie una pieza de la maquinaria. Lo que más tán notando, y sufriendo, ye la xuba del preciu de la lluz. Tarrecen que tou ello repercuta tamién nuna medría de precios del so productu final. Esto ye, de la sidra. 

“Tarrecemos tener que xubir el preciu de la sidra'l próximu añu. Anque pola demanda del mercáu, nun ye un productu que dexe alces mui importantes”, esplica José Palacio, de Viuda de Palacio. Según señala, la collecha de mazana ta siendo bona, y pel momento, nun nota qu'haya problemes colos repuestos de botelles o corchos. Pero sí que, progresivamente, foi notando como s'incrementen los precios de too.

“La tema de los suministros sí que nos afecta, nun somos ayenos. Na botella y el corchu non tanto, porque son suministros más a llargu plazu”, indica Carlos González, de Sidra Fanjul. Lo qu'empieza a ser un problema ye'l cartón, que respuende más a una demanda de productos básicos. “Ye una xuba de precios más descomanada”, recalca. 

Pero lo peor, según demanden dellos representantes del sector, ye la xuba del preciu de la enerxía y de la gasolina. “L'incrementu de la lluz ye lo que más tamos notando, con muncho, más que'l problema de los suministros”, recalca Víctor Urbieta, trabayador de Casa Fran. Pero ye mui llueu tovía pa facer valoraciones sobre si va encarecer el preciu final del productu. 

“A nós, lo que más nos esmolez de la crisis de suministros tien que ver coles pieces de les máquines. Sí que vemos que pueda haber un problema na tema de repuestos”, afirma Manuel Riestra, de Sidra Muñiz. Asegura que, mesmo qu'otres empreses, los llagares sí que tán notando la xuba del preciu de la enerxía. 

“La sidra asturiano tien una ventaya, que somos los que más reciclamos. Nel asuntu de la contaminación vamos dellos pasos per delantre, porque llevamos faciendo eso munchos años”, señala tamién el llagareru. Por eso, nun tien medrana nenguna a que pueda haber desabastecimientu de botelles. La esmolición en toos ellos, por tanto, vien más derivada de la xuba del preciu de la lluz y tamién de la gasolina, que se traduz en portes pa los tresportistes. “Yo creo que de magar s'abrieron les barres, la xente consume más”, dictamina Urbieta, optimista. Sicasí, pa dalgunos, esto nun ye abondo y tarrecen tener que xubir, a final d'añu, que ye cuando suelen facer el balance, el preciu de la bébora. “Sicasí, per esi tiempu suel haber un consumu más baxu. Ye la más floxa del añu” , indica González. Va haber qu'esperar a xineru pa facer balance d'un añu con restricciones, pandemia y xuba de precios.